Найбуйнейшая ў свеце рэгіянальная арганізацыя займаецца развіццём супрацоўніцтва і бяспекі на кантыненце. Сотні дэлегатаў з 57 краін Еўропы ўжо прыбылі ў Беларусь. Чакаецца і ўдзел у форуме Прэзідэнта Беларусі. За абмеркаваннямі сусветных праблем будуць сачыць больш як 50 замежных журналістаў і ўся беларуская прэса.
Падрабязней - Вольга Анішчанка. Сёння і да канца тыдня Мінск без перабольшання стане цэнтрам глабальнага палітычнага жыцця. Такі размах міжнароднага дыялогу ці не першы ў гісторыі краіны. Усё ж больш за 700 палітыкаў і парламентарыяў! Што, без сумнення, вызначае маштаб і ўзровень гэтых мінскіх перамоў аб самых вострых пытаннях супрацоўніцтва і бяспекі ў еўрапейскім рэгіёне. Насычаная праграма абмеркаванняў і для сталага камітэта асамблеі, і шэрагу профільных - ад зверкі найважнейшых палітычных пазіцый да пытанняў кібербяспекі, эканомікі і клопату аб навакольным асяроддзі. Адной пляцоўкай парламентарыі, вядома, не абмяжуюцца. А цэнтральным месцам сустрэч стануць інтэр'еры "Прэзідэнт-Гатэля".
Права стаць пляцоўкай абмеркавання сусветных праблем беларуская сталіца заслужыла, упэўнены кіраўнік ніжняй палаты парламента. Выбар Мінска - гэта прызнанне той ролі, якую краіна іграе ў гарантаванні бяспекі і супрацоўніцтва ў еўрапейскім рэгіёне. Пра мір і стабільнасць пры самым важкім палітычным удзеле тут гавораць не ўпершыню. Уладзімір Андрэйчанка прызнаецца: прыкметныя і ўмацаванне міжнародных пазіцый краіны, і пазітыўная танальнасць дыялогу з еўрапейскімі калегамі.
Учора Мінск сустракаў першыя дэлегацыі ўдзельнікаў сесіі. Самыя прадстаўнічыя - у ЗША, Расіі, Германіі і Італіі. У сталіцу прыбывае і кіраўнік Парламенцкай асамблеі Крысцін Мутанен. З трапа самалёта анансуе бурныя дыскусіі ў беларускай сталіцы.
Фіналам амаль тыднёвых сустрэч палітыкаў стане прыняцце выніковай дэкларацыі для ўсіх краін - удзельніц арганізацыі. Гэта такі пасыл у будучай працы для нацыянальных урадаў і парламентаў. У сферы сучасных пагроз, рацыянальных эканамічных дзеянняў, гуманітарных прыярытэтаў.
Дарэчы, наша краіна падрыхтавала праект беларускай рэзалюцыі і прэзентуе яго на сесіі. Гэта меры рэагавання на з'яўленне новых псіхатропных рэчываў, што сёння актуальна для ўсяго кантынента. Праект ужо заручыўся добрай міжнароднай падтрымкай, шматлікія палітыкі выступілі суаўтарамі. У Беларусі спадзяюцца, што ініцыятыва не застанецца незаўважанай, больш за тое, стане часткай дэкларацыі, прынятай па выніках вялікага парламенцкага дыялогу ў Мінску.
