Роўна 18 гадоў назад быў падпісаны Дагавор аб стварэнні Саюзнай дзяржавы Беларусі і Расіі. У дзень паўналецця гэтага аб'яднання ў Гомелі прайшло пасяджэнне Савета міністраў Саюзнай дзяржавы. На парадку дня абмеркавання - два дзясяткі пытанняў. Асноўная ўвага - эканоміцы. Узаемны тавараабарот паказвае сёлета вялікі рост. Тым не менш, ёсць рэзервы і магчымасці для развіцця. Сучаснасць і будучыню адносін Беларусі і Расіі прааналізаваў Аляксей Адашкін.
Ягор Мілішэнка першы раз апынуўся ў Гомельскім цэнтры радыяцыйнай медыцыны 7 гадоў назад. Дыягназ - "лейкоз". Два гады лячыўся ў стацыянары. А апошнія 5 гадоў прыязджае сюды з Расіі выключна на абследаванне, або, як гавораць урачы, у госці. Устойлівая рэмісія - гэта вынік, якога дабіліся беларускія медыкі. І падстава для радасці бацькоў.
Аляксей і Вольга Мілішэнкі, бацькі пацыента РНПЦ радыяцыйнай медыцыны і экалогіі чалавека: "Нас тут так шчыра прынялі, аказалі высокакваліфікаваную дапамогу. Мы, як бацькі, удзячныя, таму што гэта сапраўды доўгі і вялікі быў шлях, цяжкі шлях, і вельмі складаная суладная праца ўрачоў. Вынік, так, вынік у наяўнасці. Гэта вялікая падтрымка ўрачоў і псіхалагічная, і маральная, мы вельмі ўдзячныя".
Кожны год тут праходзяць лячэнне і абследаванне прыкладна 70 тысяч чалавек. Не толькі з Беларусі, але і больш чым з 20-ці краін свету. Хоць асноўная частка сярод замежных пацыентаў - расіяне.
Аляксандр Ражко, дырэктар РНПЦ радыяцыйнай медыцыны і экалогіі чалавека: "Толькі за 2016 год мы аказалі 3,5 тысячам замежных пацыентаў дапамогу. Безумоўна, мы знаходзімся блізка да мяжы з Расіяй, вельмі зацікаўленыя ў нас прымежжа. Парадку 2,5 тысяч насельніцтва гэтых рэгіёнаў прыязджае да нас на дыягностыку і лячэнне. Мы вельмі цесна працавалі ў разрэзе 4-х праграм Саюзнай дзяржавы па пераадоленні наступстваў аварыі на ЧАЭС, з Санкт-Пецярбургам, Обнінскам, Інстытутам маскоўскім".
РНПЦ радыяцыйнай медыцыны і экалогіі чалавека будавалі, у тым ліку, і за кошт Саюзнай дзяржавы. А за апошнія 15 гадоў разам з Усерасійскім цэнтрам экстраннай і радыяцыйнай медыцыны тут рэалізавалі чатыры сумесныя праграмы. І распрацавалі канцэпцыю пятай. Андрэю Кабякову і Дзмітрыю Мядзведзеву сёння паказалі работу лабараторый і некалькіх аддзяленняў гэтай клінікі. Паглядзеўшы, як на справе працуе саюзная інтэграцыя, прэм'ер-міністры пераехалі ў цэнтр Гомеля, каб за сталом перамоў абмеркаваць далейшае развіццё аб'яднання дзвюх краін.
Палац Румянцавых-Паскевічаў - знакавае месца для агульнай гісторыі Беларусі і Расіі. Гэты помнік беларускай архітэктуры быў узведзены ў канцы 18 стагоддзя для рускага палкаводца Румянцава. Адным з уладальнікаў гэтага маёнтка быў і канцлер Расійскай імперыі. Ужо ў поры незалежнай Беларусі палац быў адрэстаўрыраваны. І сёння гэта месца, улічваючы яго багатую гісторыю, як нельга лепш падыходзіць для размовы аб сучаснасці і будучыні беларуска-расійскіх адносін.
Саюзны Саўмін збіраецца двойчы на год. Папярэдняя сустрэча прайшла ў чэрвені ў Санкт-Пецярбургу. Сёння на парадку дня было больш за 20 пытанняў. Асноўны акцэнт - на эканоміцы. Расія для Беларусі - не толькі найбліжэйшы саюзнік, але і асноўны гандлёвы партнёр. За дзесяць месяцаў гэтага года ўзаемны тавараабарот склаў больш чым 26 мільярдаў долараў. Гэты паказчык павялічыўся амаль на чвэрць у параўнанні з папярэднім годам. Як зрабіць так, каб лічбы працягвалі расці, аб гэтым прэм'ер-міністры дзвюх краін гаварылі спачатку ў Каміннай зале Палаца Румянцавых-Паскевічаў у фармаце адзін на адзін. А пасля правялі некалькі раўндаў перамоў з удзелам дэлегацый.
Можна сказаць, што сёння ў Гомелі абмеркавалі ўсе сферы жыцця Саюзнай дзяржавы - ад прамысловасці да бяспекі, культуры і навукі. Не абышлося і без праблемных тэм.
Дагэтуль асобныя нашы вытворцы прадуктаў харчавання перыядычна аказваюцца пад забаронай у Расіі. На агульным рынку не павінна быць такіх бар'ераў, на гэтым настойвае беларускі бок. Беларускія прадукты пастаўляюцца ў 61-ну краіну свету. Расійскі рынак пры гэтым застаецца для нас прыярытэтным.
Менш за месяц засталося да Новага года. Сёння ў Гомелі прааналізавалі бюджэт Саюзнай дзяржавы на 2018-ты. Прыбыткі агульнай казны складуць амаль сем мільярдаў расійскіх рублёў. Сродкі пойдуць і на фінансаванне 12-ці агульных праграм. З іх тры праекты - новыя. Галоўны акцэнт - на ўкладаннях у інавацыі і навуку.
Адна з новых саюзных праграм прысвечана ўдасканаленню абароны знешніх меж. Наогул, пра бяспеку сёння шмат гаварылі ў Гомелі.
Арміі дзвюх краін робяць усё магчымае, каб быць гарантам стабільнасці ў рэгіёне. Акрамя таго, Мінск і Масква паспяхова супрацоўнічаюць у сферы барацьбы з тэрарызмам і нелегальнай міграцыяй. У найбліжэйшы час краіны рыхтуюцца падпісаць пагадненне і аб узаемным прызнанні віз.
Сёння ў Гомелі абмяркоўвалі і стратэгію развіцця Саюзнай дзяржавы па ўсіх кірунках на найбліжэйшыя пяць гадоў. Наогул, удзельнікі перамоў былі дастаткова аптымістычнымі і падкрэслівалі, што да Новага года ў рамках аб'яднання будуць вырашаны практычна ўсе пытанні, у тым ліку і самыя адчувальныя.
Пасля пасяджэння Саюзнага Саўміна для Дзмітрыя Мядзведзева правялі экскурсію па Палацы Румянцавых-Паскевічаў. Наогул, Гомель не часта прымае высокіх гасцей. Мясцовы рэстаратар Кірыл Памалейка, даведаўшыся аб правядзенні Саюзнага Саўміна, вырашыў запрасіць на абед прэм'ер-міністра саюзнай краіны. Прапанову пакаштаваць беларуска-рускі бургер адправіў праз Instagram.
Гэты рэстаран у цэнтры Гомеля адкрыўся паўгода назад. Сярод гасцей - шмат расіянаў. Кірыл Памалейка, які вывучаў у МДУ эканоміку, адзначае, што яго бізнес ад інтэграцыі атрымлівае сваю долю прыбытку.
Зрэшты, Дзмітрый Мядзведзеў сюды так і не заехаў. Можна зразумець - графік шчыльны. Але гомельскі рэстаратар не засмучаецца. Да наступнага прыезду расійскага прэм'ера абяцае распрацаваць новую саюзную страву і зноў запрасіць на дэгустацыю.
