Да выбараў дэпутатаў мясцовых Саветаў 10 дзён, а ўжо менш чым праз тыдзень пачнецца датэрміновае галасаванне. Сёння апошні дзень, калі ўчастковыя камісіі па ўсёй краіне павінны былі апавясціць выбаршчыкаў аб часе і месцы галасавання. У цэлым беларусы добра праінфармаваныя аб ходзе выбарчай кампаніі. На гэта звярнула ўвагу кіраўнік ЦВК. Лідзія Ярмошына сустрэлася з прадстаўнікамі ўчастковых камісій Цэнтральнага раёна сталіцы, выкладчыкамі і студэнтамі Белдзяржуніверсітэта фізічнай культуры. Пра актыўнасць кандыдатаў і выбаршчыкаў раскажа Вераніка Бута.
Сёння па ўсёй краіне разнеслі апошнія запрашэнні на выбары. У лістоўках інфармацыя пра час і месца галасавання, матэрыялы аб кандыдатах. У спісы выбаршчыкаў уключаны амаль 7 млн беларусаў.
Традыцыйна прагаласаваць можна будзе і дома. Напрыклад, па стане здароўя. Трэба толькі звярнуцца на свой участак для галасавання з такой просьбай. Дарэчы, участковыя камісіі ўжо перайшлі ў рэжым дзяжурства. Да афіцыйнага старту выбараў можна асабіста праверыць спісы, каб убачыць (альбо наадварот не выявіць) у іх сваё прозвішча і паспець аператыўна ўнесці карэктывы.
На выбарчых участках па ўсёй краіне ідзе апошняя падрыхтоўка. З панядзелка міліцыя пяройдзе на ўзмоцнены варыянт службы. Ахову будуць весці кругласутачна. А на працягу некалькіх дзён усе ўчасткі для галасавання забяспечаць бюлетэнямі, бо ўжо менш чым праз тыдзень іх пачнуць запаўняць выбаршчыкі.
Ужо з наступнага аўторка пачнецца датэрміновае галасаванне. Участковыя камісіі знаёмяць беларусаў са спісамі выбаршчыкаў, каб пазбегнуць якіх-небудзь памылак непасрэдна ў дзень выбараў. Не ўпусціць апошнюю магчымасць заявіць аб сабе і сваёй перадвыбарнай праграме імкнуцца кандыдаты і іх каманды. У Мінску гэтымі днямі пікеты сталі больш частай з'явай, нават нягледзячы на тое што за час электаральнай гонкі кандыдатаў стала менш, некаторыя сышлі з дыстанцыі добраахвотна. Аднак практыка паказвае: актыўныя толькі ў тых акругах, дзе высокі конкурс на дэпутацкі мандат.
Лідзія Ярмошына, старшыня Цэнтральнай камісіі Беларусі па выбарах і правядзенні рэспубліканскіх рэферэндумаў: "Там, дзе няма альтэрнатывы, якая актыўнасць? Дзе яна ёсць, у тым жа Мінску, кандыдаты за ўласныя сродкі ствараюць выбарчыя фонды і робяць рэкламную прадукцыю. Можна гаварыць пра тое, што гэтага недастаткова. Але ў параўнанні з тым, што было раней, гэты працэс мадэрнізуецца, кандыдаты становяцца ўсё больш актыўнымі".
І сучаснымі. Сёння кандыдаты для піяру часта выкарыстоўваюць сацсеткі. З іншых даступных і бясплатных рэсурсаў для агітацыі - радыёэфір.
У Беларусі няма ніводнай акругі без кандыдатаў. Выбары адбудуцца пры любым раскладзе - нават пры мінімальнай цікавасці да іх выбаршчыкаў. Праўда, абыякавасць тут усё роўна недапушчальная, упэўнена кіраўнік ЦВК.
Гэтых юнакоў і дзяўчат абыякавымі не назавеш. Многія з іх ужо самі дэпутаты. Пакуль, праўда, моладзевага парламента. З часам яны гатовыя скласці канкурэнцыю на выбарах, а пакуль іх пасвяцілі ў выбаршчыкі. Гэта будзе першая дарослая электаральная гонка ў іх жыцці.
Сёння Лідзія Ярмошына сустрэлася са студэнтамі і выкладчыкамі ўніверсітэта фізкультуры, каб асабіста нагадаць: яўка выбаршчыкаў - аснова легітымнасці (гэта значыць законнасці) мясцовай улады. І трэба ўжо адмовіцца ад прынцыпу "выбары нічога не вырашаюць". Падчас сустрэчы агучылі і вынікі сацапытання жыхароў Цэнтральнага раёна. Вынікі паказалі: большасць ведала аб маючых адбыцца выбарах яшчэ задоўга да старту актыўнай фазы электаральнай гонкі. Зараз важна, каб гэтыя людзі дайшлі да сваіх участкаў.
Гэтая перадвыбарная кампанія адрозніваецца свежымі ідэямі. Напрыклад, усё больш папулярныя мабільныя дадаткі з інфармацыяй аб кандыдатах, выбарчых участках і маршрутах да іх. Яшчэ адзін крэатыўны падыход прыцягнуць на выбары моладзь - конкурс сэлфі на ўчастках для галасавання. Яўка маладых людзей - вострая тэма любых выбараў. Гэта агульнасусветная тэндэнцыя. Але яе ўсё ж паспрабуюць зламаць.
