Удасканаліць падыходы да сістэмы калектыўнай бяспекі з улікам новых выклікаў. Пра гэта заявіў Генсакратар АДКБ Мікалай Бардзюжа пасля пасяджэння ваеннага камітэта, якое адбылося сёння ў Мінску. Вялікую ўвагу надалі ацэнцы ваенна-палітычнага становішча ў свеце. Яно з кожным днём пагаршаецца, абвастраецца. А гэта, зразумела, патрабуе ўвагі ваеннага альянсу. У сваю чаргу, адказваючы на пытанне журналістаў аб карысці правядзення сумесных вучэнняў у рамках АДКБ, начальнік Генштаба Узброеных сіл Алег Белаконеў адзначыў, што кожная дзяржава мае свае нацыянальныя асаблівасці. Комплексныя вучэнні, перш за ўсё, гэта ваенны складальнік, які дае магчымасць прааналізаваць, чаго дасягнула кожная з краін-удзельніц, і пры неабходнасці прыняць гэта на ўзбраенне.
Мікалай Бардзюжа, Генеральны сакратар АДКБ: "Вельмі вялікую ўвагу начальнікі генеральных штабоў надалі ацэнцы ваенна-палітычнага становішча. Вы ведаеце, што яно з кожным днём пагаршаецца, яно абвастраецца, мы бачым тыя манеўры, якія НАТА праводзіць каля нашых меж. Гэта, зразумела, патрабуе нашай увагі, зразумела, патрабуе ўвагі і ацэнка, якая складваецца ў азіяцкім рэгіёне, з улікам фактару ў Афганістане. І сёння дастаткова глыбока былі абмеркаваны гэтыя пытанні, выпрацаваны агульныя пазіцыі. Таму я думаю, што гэта дасць нам падставу ў сферы далейшай працы ў сістэме бяспекі, арыентуючы яе на новыя элементы ў палітычнай абстаноўцы".
І сёння зрабілі афіцыйную заяву - у 2017 годзе пачне працаваць цэнтр крызіснага рэагавання АДКБ. Рашэнне аб стварэнні падпісана. Для гэтага ёсць уся нарматыўная база, якая будзе рэгуляваць яго дзейнасць. Гаворка ідзе пра тое, каб забяспечыць пастаяннае ўзаемадзеянне з дзяржавамі ў сферы абмену інфармацыяй, правядзення закрытых відэаканферэнцсувязяў, ацэнкі сітуацыі ў тым або іншым рэгіёне. Яго апрабацыя пройдзе на базе Беларусі, Казахстана і Расіі.
