Місія назіральнікаў ад краін СНД на выбарах Прэзідэнта Беларусі пачала працу

Сёння ў нашай краіне пачала працу місія назіральнікаў ад СНД на выбарах Прэзідэнта Рэспублікі Беларусь. Ужо на наступным тыдні яе члены адправяцца ў рэгіёны. Там яны вывучаць гатовасць выбарчых камісій, участкаў для галасавання, а таксама ход агітацыйных кампаній у раённых цэнтрах. Пра гэта распавёў Віктар Гумінскі, кіраўнік штаба місіі назіральнікаў ад СНД, на сустрэчы са старшынёй Цэнтрвыбаркама Лідзіяй Ярмошынай. Групы назіральнікаў будуць сфарміраваныя з ліку супрацоўнікаў Выканкама СНД і прадстаўнікоў пасольстваў краін Садружнасці ў Беларусі.

Віктар Гумінскі, кіраўнік штаба місіі назіральнікаў ад СНД на выбарах Прэзідэнта Беларусі: "Ёсць каляндарны план Цэнтральнай выбарчай камісіі, там распісаныя ўсе тэрміны,  што да чаго павінна быць зроблена. І адпаведна, нашы назіральнікі будуць вывучаць гэтыя пытанні. Калі вызначана, што вылучыць месцы для сустрэчы з выбаршчыкамі  ў населеных пунктах, мы павінны ўпэўніцца, што яны вылучаныя рашэннем мясцовых выканаўчых органаў. Усё, што ў каляндарным плане, мы будзем глядзець, вывучаць".

На гэты момант склад місіі яшчэ фарміруецца. Выканкам СНД разаслаў запрашэнні ў краіны Садружнасці з просьбай паведаміць кандыдатуры сваіх назіральнікаў. Зваротныя заяўкі ўжо атрыманыя ад Дзярждумы Расіі, дэпутатаў Азербайджана і членаў Цэнтрвыбаркама гэтай краіны.