Бяссонныя ночы на мяжы і асабліва дбайныя агляды - у разгар курортнага сезона. Заложнікамі італьянскай забастоўкі літоўскіх пагранічнікаў сталі перавозчыкі і звычайныя грамадзяне. Вось ужо другія суткі супрацоўнікі мяжы пратэстуюць і з асаблівай стараннасцю выконваюць свае абавязкі - павольна і як мага больш строга. Калі раней за гадзіну мытнае афармленне праходзілі каля 40 аўтамабіляў, дык зараз усяго 8. Зараз самая свежая інфармацыя з мяжы - адтуль толькі што вярнулася наша здымачная група.
Расказвае Уладзімір Каралёў: Тры дні літоўскія пагранічнікі вырашылі дамагацца павышэння зарплаты. Гэта ў разгар курортнага сезона, калі чэргі аўтамабіляў пацягнуліся да Балтыйскага мора. Яго халодны вецер, здавалася, далятаў да еўрапейскай мяжы. Забастоўка італьянская, пагранічнікі літоўскія, чэргі беларускія. Зараз на Каменным Логу знаходзяцца больш за сто аўтамабіляў, пераважна фуры. Пры прапускной здольнасці 2 000 машын у сярэднім кожную гадзіну праязджае не больш за 15. Шматгадзінныя прастоі выклікаюць незадаволенасць у людзей.
Яшчэ ўчора, падавалася, амаль нічога не адбываецца. Напрыклад, шлях з Гродна ў Друскінінкай па часе асабліва не змяніўся. Аднак суткі прыкметна адбіліся на двух самых запатрабаваных КПП. У Катлоўцы і ў Каменным Логу чэргі з машын ужо дасягаюць сотняў. Чалавечае цярпенне вычарпанае. Два кіламетры расцягнуліся на суткі.
Калі раней на літоўскім баку за гадзіну афармленне праходзілі 40 машын, дык зараз толькі 8. На гэты момант у пункце пропуску Катлоўка на выезд з Беларусі ўтварылася чарга з 270 аўтамабіляў, з іх 150 грузавых. Сітуацыя ў Каменным Логу ў параўнанні з учарашнім днём не надта змянілася: 30 легкавых і 110 грузавых машын.
Яшчэ адным выпрабаваннем стала спякота. Прыдарожныя магазіны ўжо свецяць пустымі паліцамі. Ваду падвозяць аператыўна, але калі машын стане больш, то дэфіцыт толькі павялічыцца.
На літоўскім баку сітуацыя не нашмат лепшая. Паводле слоў вадзіцеляў, складана праехаць нават машынам з выбухованебяспечнымі грузамі і грузамі, якія хутка псуюцца. Хоць яны, як і раней, маюць права без чаргі перасячы мяжу. Пакуль сітуацыя не крытычная, аднак многія ўжо рызыкуюць якасцю прадуктаў. Цярпенне ў людзей зусім не еўрапейскае. Беларускія службы тэмпаў працы не знізілі, аднак і павялічыць іх магчымасці няма. Чарга з беларускага Каменнага Лога ў літоўскі Мядзінінкай амаль не рухаецца.
Нагадаем, прафсаюз пагранічнікаў Літвы абвясціў трохдзённую італьянскую забастоўку. Спецыфіка яе такая, што свае абавязкі спецыялісты выконваюць у поўным аб'ёме, аднак вельмі ўнікліва і з выкананнем усіх бюракратычных канонаў, што значна памяншае прадукцыйнасць. Такім чынам літоўскія праваахоўнікі хочуць дамагчыся 40-гадзіннага працоўнага тыдня, своечасовай выплаты зарплаты і аплаты сталай перапрацоўкі.
Нягледзячы на тое што вартавыя еўрапейскіх межаў ужо папрасілі выбачэння ва ўсіх, хто стаў крайнім праз іх праблемы, падтрымку яны знаходзяць вельмі рэдка. Тым больш што адразу пасля трэцяга дня забастоўкі наступіць звычайная пятніца. Той дзень, калі чэргі на гэтых кірунках і так часам стаяць па 8-10 гадзін. Дзяржпагранкамітэт у гэтай сітуацыі рэкамендуе для ўезду ў Еўрасаюз выкарыстаць пункты пропуску на межах Польшчы і Латвіі.
