Выстава да 75-годдзя вызвалення Беларусі адкрылася ў Маскве

Прэзентацыя праекта "Аперацыя "Баграціён". Разгром" да 75-годдзя вызвалення Беларусі ад нямецка-фашысцкіх захопнікаў прайшла ў Маскве. У экспазіцыі - больш за 150 рарытэтаў з фондаў беларускага музея Вялікай Айчыннай вайны і музея Перамогі на Паклоннай гары. Праз фатаграфіі і архіўныя дакументы наведвальнікі даведаюцца пра страшны час нямецкай акупацыі Беларусі. Ад расстрэлаў, генацыду, голаду і інфекцыйных захворванняў загінула каля двух з паловай мільёнаў жыхароў краіны. Падрабязна паказаная і гісторыя партызанскага руху, а таксама вызвалення найбуйнейшых і стратэгічна значных гарадоў: Мінска, Віцебска, Бабруйска, Магілёва. 

"Баграціён" - адна з самых паспяховых аперацый Чырвонай арміі. У выніку двухмесячнага наступу савецкія войскі на лініі фронту даўжынёй больш за тысячу кіламетраў прасунуліся ўглыб на 600 кіламетраў. Цалкам вызвалілі Беларусь, часткова краіны Балтыі і ўсходнія раёны Польшчы.