Участак - у лесапаркавай зоне, здавалася б, ідэальнае месца для касцёла і яго вернікаў. Але вось тут і ўзнікла загваздка. Жыхары найбліжэйшых дамоў апынуліся пастаўленымі перад фактам, што адзіны зялёны сквер у гэтым раёне, а разам з ім і ўвесь раслінны масіў, пойдзе пад будаўніцтва будынка. Прычым, грамадскасцю план забудовы не абмяркоўваўся. Як вырашыцца пытанне - разбіралася Наталля Кузьміцкая.
Будаўніцтва гэтай маленькай капліцы было завершанае ў 2010 годзе. Але ў перспектыве тут павінен з'явіцца цэлы комплекс - каталіцкі касцёл з вячэрняй школай. Як вядома, храмы будуюцца на ахвяраванні, і калі неабходная частка сродкаў была сабраная, тут з'явіўся пашпарт аб'екта.
Падрыхтоўка будаўнічай пляцоўкі запатрабавала высечкі дрэў. У выніку жыхары найбліжэйшых дамоў прачнуліся пад стук сякер і гук бензапіл.
Для большасці мясцовых жыхароў гэтая лесапаркавая зона - адзінае месца для адпачынку і шпацыраў. Яны не супраць узвядзення касцёла, але супраць любога будаўніцтва на тэрыторыі зялёнага масіву. Тым больш што на грамадскім абмеркаванні плана дэталёвай планіроўкі мікрараёна Дамброўка ў сакавіку 2016-га забудова гэтай пляцоўкі не абмяркоўвалася. А праект каталіцкага храма ў плане лічыўся як перспектыўны.
Хоць у той жа самы час дазвол на будаўніцтва цэлага комплексу прадстаўнікі рэлігійнай суполкі атрымалі яшчэ ў 2009 годзе. Аб чым па невядомых прычынах у сваім адказе не апавясціў жыхароў Дамброўкі Мінскпраект.
А ў жніўні гэтага года, паводле акта выбаркі зямельных участкаў ад 2009-га, прыходу была вылучаная дадатковая тэрыторыя, пасля чаго пачалася падрыхтоўка дакументаў на будаўніцтва касцёла.
Бо дазвол на аб'ект быў атрыманы яшчэ ў 2009 годзе, і пасля праходзіў некалькі публічных разглядаў плана дэталёвай планіроўкі, у якіх касцёл лічыўся перспектыўным, а наступны этап, лагічна, будаўніцтва - праводзіць паўторнае абмеркаванне не палічылі неабходным. Камітэт архітэктуры і горадабудаўніцтва ўжо падрыхтаваў адказ жыхарам мікрараёна Дамброўка, дзе падрабязна растлумачаны працэс вылучэння зямельных участкаў.