У школах сёння гучаў апошні званок

30 Мая 2017

Віншаванні, кветкі, усмешкі і ўспаміны. Для адзінаццаці- і дзевяцікласнікаў у школах сёння гучаў апошні званок. Свае парты сёлета пакінуць больш за 145 тысяч выпускнікоў. Але адпачываць пакуль рана. Ужо ў чацвер - першыя іспыты, затым выпускны баль і самая гарачая пара - уступная кампанія. Аб незабыўным свяце развітання са школай рэпартаж Таццяны Кароль.

Менавіта гэтага дня кожны школьнік чакае з адмысловым трапятаннем. Але выпускніцы Арыне Ганчарык выпраўкі і спакою не займаць. Калі яе сяброўкі жадаюць стаць урачом, педагогам або дызайнерам, то не мара, а мэта Арыны - вучоба ў Акадэміі МУС па спецыялізацыі "судова-пракурорска-следчая дзейнасць".

Але 8 гадоў заняткаў бальнымі танцамі не прайшлі дарма, і сёння разам са сваім 11 "А" на парозе роднай гімназіі Арына танцуе традыцыйны школьны вальс. Ледзь пазней яны будуць дзякаваць педагогам і адно аднаму і шмат успамінаць гады, што зараз стануць старонкай мінулага.

І цяжка паверыць, што 11 гадоў таму яны былі вось такімі непасрэднымі і сарамлівымі - першакласнікі падрыхтавалі выпускнікам сваё віншаванне. Педагогі, з цяжкасцю стрымліваючы слёзы, адпускаюць з-за школьнай парты тых, каго ўсе гэтыя гады вучылі быць самастойнымі. Свае пажаданні выпускнікам сёння выказваюць і запрошаныя госці.

Дзякавалі сёння сваім настаўнікам сталічныя выпускнікі не толькі на роднай мове.

Гэтыя выпускнікі 12-й мінскай гімназіі - першапраходцы. Менавіта гэтая школа стала першай, дзе пачалі вучыць кітайскую. І праз 11 гадоў клас свабодна піша, гаворыць і чытае па-кітайску.

У Магілёве апошні званок адзначылі танцавальным флешмобам.

Вальс выпускнікоў на плошчы Славы праходзіў упершыню. На яго падрыхтоўку пайшло амаль два месяцы.

У Віцебску апошні дзень школьнага года адзначаюць вялікім канцэртам у Летнім амфітэатры. Тут нават апошні школьны званок праходзіць з фэставым размахам. І ў кожнага выпускніка ёсць магчымасць адчуць сябе сапраўдным артыстам.

У атэстаце Савелія Кузняцова - сярэдні баль вышэйшы за 9, ён сапраўды ведае, дзе жадае вучыцца далей.

Такую апошнюю святочную лінейку самі выпускнікі завуць пунктам адліку сваіх поспехаў і перамог ужо ў дарослым, самастойным жыцці. Сёння іх дзень - радасны і сумны адначасова, бо з сімвалічным званком яны развітваюцца не проста з любімай школай, з лепшым часам бестурботнага дзяцінства.

Амаль 58 тысяч беларусаў сёння пачулі свой апошні школьны званок. Праўда, яшчэ 10 дзён адзінаццацікласнікі будуць адчуваць сябе гаспадарамі сваіх альма-матар, бо наперадзе яшчэ выпускныя іспыты па рускай або беларускай мове, гісторыі Беларусі, матэматыцы і замежнай мове. Першы пачнецца ўжо ў гэты чацвер.

А пасля - доўгачаканы выпускны. Сёлета ва ўсіх школах краіны ён пройдзе 9 і 10 чэрвеня. І раніцай, сустракаючы світанак, ужо былыя школьнікі загадаюць свае запаветныя жаданні.