Гэта значыць выдаткі павялічыліся. Прычым, траціць больш грошай дзяржава будзе не толькі на меню ў школах, але яшчэ і ў дзіцячых дамах, інтэрнатах і лагерах.
Што зараз падаюць на стол, раскажа Паліна Іванча.
Запяканка, пудынг або грэцкая каша - што есці на сняданак, вучні 125-й сталічнай школы вырашаюць самі. Модны фармат шведскага стала тут спадабаўся некалькі гадоў таму. І прыжыўся. Пакаштаваць можна ўсе стравы, якія ёсць у меню на дзень.
Літаральна на днях расходы на харчаванне школьнікаў пералічылі і пастановай урада замацавалі новыя, больш сур'ёзныя лічбы. Гаворка ідзе пра льготныя абеды ў школах і не толькі. Траціць больш дзяржава будзе зараз яшчэ на меню дзіцячых дамоў і інтэрнатаў, аздараўленчых лагераў, а таксама каледжаў і тэхнікумаў.
У тым, што яе дзеці, акрамя ежы для розуму на ўроках, у школьнай сталовай змогуць своечасова падсілкавацца, настаўнік Жанна Крамень не сумняваецца. Абедзенны комплекс ёй абходзіцца ўсяго ў 15 тысяч рублёў, як, зрэшты, і ўсім астатнім бацькам краіны.
Дарэчы, амаль 140 тысяч беларускіх школьнікаў сёння снедаюць і абедаюць у сталовых абсалютна бясплатна. Для тых жа, у каго няма ніякіх ільгот, харчаванне, вядома ж, платнае, але па цане даступнае.
На працягу двух тыдняў ні адна страва ў школьным меню не паўторыцца. Розніцы паміж платным харчаваннем і льготным ніякай. Кулінарныя прапановы адрозніваюцца хіба што па ўзросце дзяцей: асобнае меню для вучняў малодшых класаў, для падлеткаў 11-13 гадоў і для старшакласнікаў.
Дарэчы, усе стравы ў школьных сталовых повары гатуюць выключна з беларускіх прадуктаў. З нядаўняга часу ў некаторых школах практыкуюць так званыя тэматычныя дні - прапануюць пакаштаваць, напрыклад, у сераду стравы беларускай нацыянальнай кухні. І новыя прапановы ўжо цяперашняга навучальнага года - фіта- і малочныя бары, а яшчэ чайныя і вітамінавыя перапынкі.
