"Уваход забаронены". Знаходжанне на тэрыторыі стала рызыкоўным
"Уваход забаронены" - такая таблічка ля варот Мсціслаўскай дзіцячай школы мастацтваў ужо некалькі сезонаў. Установа адукацыі, якая тулілася ў гістарычным ансамблі былога калегіума езуітаў, была вымушана выехаць адгэтуль у 2017 годзе. У дамінанце архітэктурнага комплексу - касцёле Святога Міхаіла Архангела - абвалілася сцяна. Знаходжанне на тэрыторыі стала рызыкоўным.Ансамбль езуіцкага калегіума - сапраўдная жамчужына Мсціслава. Яго ўзвядзенне ў 18 стагоддзі падтрымаў сам Жыгімонт Трэці. У гэтых сценах духоўны ордэн вёў адукацыйную і фармацэўтычную дзейнасць - працавалі калегіум і аптэка.
Людміла Кірыенка, дырэктар Мсціслаўскага раённага гісторыка-археалагічнага музея: "Яны пачынаюць распаўсюджванне лекавай справы ў нас на Мсціслаўшчыне. На сваіх гародах яны вырошчваюць лекавыя расліны і вырабляюць лекі. У гадзіну эпідэміі яны зніжалі цану, каб можна было простаму купіць лекі".
Помнік архітэктуры 18 стагоддзя зведаў шматлікае
Помнік архітэктуры 18 стагоддзя зведаў шматлікае - яго перабудоўвалі ў праваслаўны храм і адаптавалі пад Дом культуры. Доўгі час касцёл заставаўся без гаспадара. Зараз комплекс знаходзіцца на балансе мясцовага гісторыка-археалагічнага музея. Раённай казне такі дарагі праект было не пацягнуць. "Выратавальная аперацыя" была запушчана дзякуючы падтрымцы на вышэйшым узроўні. Больш за мільён сто тысяч рублёў вылучана фондам Прэзідэнта Беларусі па падтрымцы культуры і мастацтва. Яшчэ 400 тысяч - з раённага бюджэту. Зараз будаўнікі дэмантуюць астаткі даху. Яе заменіць больш аблегчаная канструкцыя. Гэта дазволіць перашкаджаць трапленню вільгаці ўнутр будынка і тым самым правакаваць абвалы. Таксама закладзены цэглай аконныя праёмы.Галоўная задача на аб'екце сёння - не дапусціць далейшага разбурэння помніка архітэктуры. Так летась з мэтай умацаваць апорныя сцены былі ўсталяваныя вось такія металічныя канструкцыі - контрфорсы.
Каб захаваць помнік барока, прыйдзецца ахвяраваць скляпамі
Іх вычысцілі і неўзабаве засыпяць пяском. Дарэчы, на аб'екце беражліва ставяцца да кожнага абломка, які ў іншай сітуацыі ўспрымаўся б будаўнічым смеццем.Ігар Савіцкі, галоўны спецыяліст аддзела Мсціслаўскага райвыканкама: "Мы разумеем, што такіх будаўнічых матэрыялаў у рэспубліцы не выпускаецца. І было прынята рашэнне, што цэгла, якая знаходзіцца ў добрым стане, была захавана і вывезена ў спецыяльнае месца складзіравання".
Калі славутасць стане даступнай для турыстаў - пытанне адкрытае. Кансервацыю плануюць завяршыць да канца года. Плана на поўнае аднаўленне помніка пакуль няма - аб'ект працягнуць вывучаць спецыялісты, каб прапанаваць шляхі адраджэння нацыянальнага набытку.
