У Магілёве выяўлены і ліквідаваны канал па вывазе дзяўчат у Расію для аказання інтымных паслуг. Злачынная група, якая арганізавала гандаль жывым таварам, складалася з трох чалавек: двух расіян і беларуса. Пазнаёміліся маладыя людзі ў Саратаве, калі магіляўчанін прыязджаў туды адпачываць. Кампаньёны дамовіліся, што жыхар Магілёва завярбуе ў сябе ў горадзе некалькіх дзяўчат. Пасля гэтага расіяне вывезуць жанчын з Беларусі. Сваю працу вярбоўшчык выканаў, знайшоў дзвюх дзяўчын, гатовых працаваць у Саратаве. Па іх прыехалі трафікёры, але па дарозе ў Расію сутэнёраў і іх падапечных затрымалі беларускія аператыўнікі.
Сяргей Колтун, намеснік начальніка ўпраўлення па наркакантролі і процідзеянні гандлю людзьмі МУС Беларусі: "Затрыманыя змешчаныя ў ізалятар часовага ўтрымання. Усе трое не працуюць, двое з іх судзімыя за незаконны абарот наркотыкаў і злоснае хуліганства. Узбуджаная крымінальная справа за выкарыстанне заняткам прастытуцыяй, спалучанае з вывазам за межы дзяржавы асобы для занятку прастытуцыяй. Санкцыя артыкула прадугледжвае пакаранне да 10 гадоў пазбаўлення волі".
Толькі з пачатку года аператыўнікам удалося ліквідаваць чатыры каналы па вывазе беларусак за мяжу. У двух выпадках дзяўчат павінны былі адправіць у Турцыю, яшчэ ў двух - у Расію.
