Вялікі перапалох у мінскім Цэнтры акіянаграфіі. Акулы прынеслі патомства ў няволі - і цяпер гэта маленькая навуковая сенсацыя. Убачыць на свае вочы малых пакуль немагчыма. Акулы-кошкі ў адрозненне ад сваіх суродзічаў не жывародзячыя. Яны адклалі два яйкі, у якіх і развіваліся эмбрыёны. Для Кая і Герды (менавіта такія імёны атрымалі насельнікі сталічнага акіянарыума) створаная экасістэма, якая імітуе ўмовы роднага для іх Атлантычнага акіяна, а для іх нашчадкаў - асобны спецыяльны міні-інкубатар. У прыродным асяроддзі плод акулы-кошкі развіваецца на працягу 7-8 месяцаў.
Дзве акулы-кошкі пасяліліся ў Мінскім акіянарыуме ўсяго тры месяцы таму. Прыехалі яны з далёкага Сінгапура. Але, напэўна, ім настолькі тут спадабалася, жартуюць работнікі, што вырашылі нават пакінуць пасля сябе патомства. Гэта стала вялікім сюрпрызам, бо ў няволі нараджэнне акул - вельмі рэдкая падзея.
