Сёння Венесуэла адзначае нацыянальнае свята - Дзень незалежнасці. Па ўсёй краіне пройдуць масавыя гулянні. А ў Каракасе традыцыйна будзе арганізаваны ваенны парад. Прэзідэнт Аляксандр Лукашэнка ад імя беларускага народа і сябе асабіста павіншаваў Прэзідэнта Венесуэлы Нікаласа Мадуру і грамадзян гэтай краіны з Днём незалежнасці. Мінск і Каракас - браты і стратэгічныя партнёры, падкрэсліў беларускі лідар. Пра важнасць адносін такога ўзроўню заявіў і пасол Венесуэлы ў нашай краіне Хасэ Хаакін Багіяна Перычы.
Хасэ Хаакін Багіяна Перычы, Надзвычайны і Паўнамоцны Пасол Венесуэлы ў Беларусі:
"Сёння мы адзначаем Дзень незалежнасці Венесуэлы, а два дні таму вы святкавалі свой Дзень Незалежнасці. Нашы краіны падобныя. І Беларусь, і Венесуэла цэняць сваю незалежнасць і свой суверэнітэт. І абедзве краіны выступаюць за свет без войнаў і канфліктаў, за павагу да права народаў на самавызначэнне".
Урачыстае мерапрыемства з нагоды 207-й гадавіны абвяшчэння незалежнасці Венесуэлы прайшло і ў Мінску ў скверы імя Сымона Балівара. Удзел у ім прынялі прадстаўнікі беларускага МЗС, дыпкорпусу, студэнты і венесуэльскія курсанты Ваеннай акадэміі Беларусі.
