Імёны самых шматабяцальных беларускіх дызайнераў, фатографаў і мадэляў даведаемся сёння вечарам

Усвядомленая мода і стыльныя сілуэты з натуральнай тканіны - такія тэндэнцыі прапаноўвае "Млын моды - 2020". Конкурсны подыум да гэтага моманту прыняў каля 35 капсульных калекцый, сам паказ працягваецца каля трох гадзін. Усяго ў фінале Рэспубліканскага фестывалю-конкурсу ўдзельнічаюць больш за паўсотні беларускіх аўтараў. За званне лепшага ў моднай індустрыі змагаюцца не толькі дызайнеры, асобныя намінацыі прадугледжаныя для фатографаў, мадэляў і стылістаў. Сёлета форум праходзіць без гледачоў, у анлайн-фармаце. Выбірае заканадаўцаў трэндаў беларускае журы і міжнародныя эксперты.

Ігар Іваноў, загадчык аддзела моды і дызайну Нацыянальнага цэнтра мастацкай творчасці дзяцей і моладзі: "Млын моды" - гэта такая асобная фэшн-гісторыя ў нашай краіне. Таму што многія дызайнеры, якія зараз працуюць на беларускіх прадпрыемствах, якія стварылі свае брэнды, якія паспяхова развіваюцца, калісьці пачыналі з "Млыны моды". Гэтак жа выходзілі маладымі на гэты подыум, спаборнічалі, хваляваліся, атрымлівалі ўзнагароды. "Млын моды" - гэта такі шлях ад распачынання да стварэння чагосьці больш прафесійнага".

Імёны самых шматабяцальных беларускіх дызайнераў, фатографаў і мадэляў даведаемся праз некалькі гадзін пасля завяршэння дэфіле. Пераможцы атрымаюць спецыяльныя прызы і магчымасць удзельнічаць у міжнародных творчых майстэрнях.