Жыллё для льготнікаў будуць будаваць па дзяржзаказу, чаргавікі атрымаюць права выбраць ужо гатовую кватэру. Таксама вызначаюцца ўмовы для забудоўшчыкаў - гэта жорсткія тэрміны і нязменны кошт квадратнага метра. Стаўку зробяць і на развіццё арэндных дамоў, толькі сёлета ў краіне пабудуюць 220 тысяч квадратных метраў такога жылля. Сёння ў спісе тых, хто мае патрэбу ў жыллі, - 814 тысяч сем'яў.
Яшчэ адзін кірунак - індывідуальнае будаўніцтва. Згодна з планамі, катэджныя пасёлкі павінны расці паблізу буйных гарадоў. Усю інфраструктуру прафінансуе дзяржава - пад'язная дарога, вадаправод і сеткі электраперадачы. Дом можна будзе за тры гады пабудаваць самім, або набыць у крэдыт гатовы катэдж з арыгінальным архітэктурным рашэннем. Развіццё атрымае і іпатэка, да канца года ў краіне павінна пачаць працаваць нацыянальнае іпатэчнае агенцтва.