У Брэсцкай вобласці ўрачы выпісваюць пацыентам афіцыйныя рэкамендацыі для наведвання басейна. Плаванне, як вядома, з'яўляецца самым карысным відам спорту для чалавечага арганізма, а кіраўнікі спарткомплекса, карыстаючыся аўтарытэтам людзей у белых халатах, такім вось арыгінальным спосабам забяспечваюць поўную загрузку аб'екта. Аб эфектыўнасці работы фізкультурных будынкаў сёння ішла размова на пленарным пасяджэнні спецыяльнай камісіі. Яе мэта - стымуляваць беларусаў да фізічнага развіцця і дабіцца рэнтабельнасці спарткомплексаў.
Больш падрабязна - Мікалай Стула. Паводле статыстыкі, фізкультурна-спартыўных будынкаў у краіне дастаткова, але ў большасці выпадкаў аб іх самаакупнасці гаварыць не даводзіцца. У той жа час у некаторых гарадах існуе дэфіцыт, напрыклад, басейнаў - сталіца проста задыхаецца ад шчыльнасці на блакітных дарожках. Такі дысбаланс ад таго, што падчас будаўніцтва аб'ектаў не ўлічвалася шчыльнасць насельніцтва і дэмаграфічная сітуацыя ў гарадах. Там, дзе пабудавалі не падумаўшы, немагчыма выйсці нават на 30% рэнтабельнасці. Адзін тэнісны корт або трэнажорная зала не забяспечыць рэнтабельнасць спарткомплекса. Вялікі выбар інвентара ў пункце пракату таксама не дапаможа. Без аказання няпрофільных паслуг у гэтай справе не абысціся. У самым паспяховым спарткомплексе сталіцы, які знаходзіцца ў мікрараёне Серабранка, такіх паслуг 19%. Тут ёсць нават хімчыстка і спа-салон. Патрабаванне зарабляць на кожным квадратным метры прымушае ўносіць карэктывы нават падчас будаўніцтва аб'ектаў. Так на стадыёне Арбіта з аднаго боку поля планаваліся трыбуны, нават палі паставілі, але па факце там будуць корты, якія можна здаваць у арэнду. Ёсць у сталіцы і прыклад удалага функцыянавання лядовай пляцоўкі. Тая, што пад адкрытым небам побач з Палацам спорту, прынесла прыбыткі на паўтара мільярда, а летам яна выдаткаў не запатрабуе. Зрэшты, у пагоні за доўгім рублём кіраўнікоў спарткомплексаў заклікаюць не забываць і аб сацыяльнай функцыі. Пятая частка цаны білета ў спарткомплекс ідзе на падаткі - гэта шмат: магчыма, хутка аздараўленне стане таннейшым. Для таго каб спартыўныя комплексы прыцягвалі прафесійныя клубы, там патрэбныя пляцоўкі стандартных памераў і гасцінічна-аднаўленчы комплекс. Тады будзе замкнёны цыкл падрыхтоўкі для навучальна-трэніровачнага збору, тады ў Лядовы палац у тых жа Пружанах пойдуць грошы. Яшчэ адна бяда галіны - адсутнасць рэкламы. Няма элементарных паказальнікаў, а як магчыма без добрага інтэрнэт-сайта займацца ўязным турызмам? У Беларусі каля 15% насельніцтва рэгулярна займаецца фізкультурай і спортам. Гэта больш, чым у суседзяў, але ў краінах, якія рэгулярна на вядучых пазіцыях у алімпійскіх заліках, гэты паказчык дасягае 30%.
