Трэці клас пажарнай небяспекі ўведзены ў лясах у 5 раёнах Мінскай вобласці. Наведванне масіваў абмежавана, а гэта значыць, што ўезд на асабістым транспарце і развядзенне вогнішчаў забаронена. Улічваючы ўмовы надвор'я, ва ўзмоцненым рэжыме працуюць супрацоўнікі лясной аховы. На ўзнікненне ўзгаранняў сухой расліннасці рэагуюць максімальна аператыўна. Лес патрулююць пешыя групы, зверху масіў аглядаюць з дапамогай дронаў.
Першыя прыкметы ляснога ўзгарання фіксуе спецыяльная праграма. Інфармацыя з камер відэаназірання паступае ў пункты кіравання. Работнікі лесу фіксуюць найменшы дым на гарызонце і выязджаюць на месца для ліквідацыі пажару.
Перад выхадам у лес на прагулку варта абавязкова азнаёміцца з інтэрактыўнай картай на сайце Міністэрства лясной гаспадаркі, каб даведацца пра сітуацыю ў масівах. За парушэнне правілаў наведвання лясоў прадугледжаны штраф.
