Ля стэлы "Мінск - горад-герой" праходзіць канцэрт "Беларусь бязмежная". Самыя яркія моманты праграмы

Музычны оўпэн-эйр з удзелам папулярных артыстаў і калектываў збірае сотні гледачоў, якія сёння вырашылі разам адзначыць Дзень Незалежнасці. 

Кульмінацыяй канцэртнай праграмы стане акцыя "Праспяваем гімн разам". 

У гэты час ён загучыць ва ўсіх абласных цэнтрах. І гэта таксама традыцыя сучаснай Беларусі, калі ўся краіна ва ўнісон выконвае гімн - адзін з галоўных дзяржаўных сімвалаў. 

Апошнія гукі гімна будуць падхопленыя маляўнічым феерверкам. На прамой сувязі са студыяй Ніна Мажэйка. 

Далучаюся да шматлікіх віншаванняў у гэты святочны дзень. І спяшаюся расказаць пра тое, што канцэрт ужо пачаўся. Традыцыйна менавіта стэла "Мінск - горад-герой" - сімвалічны цэнтр шоу-праграмы. І невыпадкова манумент уваходзіць у адзіны ансамбль з Беларускім дзяржаўным музеем гісторыі Вялікай Айчыннай вайны. У Дзень Перамогі Радзіма-маці традыцыйна сустракае парад. Акрамя таго, помнік уваходзіць у Дзяржаўны спіс гісторыка-культурных каштоўнасцяў нашай краіны - і гэта зразумела. У Беларусі памятаюць герояў вайны, а таксама паважаюць герояў дня сённяшняга. А зараз падрабязней пра сам канцэрт. 

Сёлета праграма складаецца з пяці або нават шасці блокаў, уключаючы начное танцавальнае аддзяленне. Масткамі да кожнага стануць тэматычныя хештэгі кшталту #беларусь_незалежная, #душа_народная, #дзякуй_ад_сэрца.  Над праграмай працавалі некалькі месяцаў. Што ж да самой пляцоўкі, яе зрабілі больш тэхналагічнай: з інтэрактыўнай падлогай, гнуткім святлом і спецэфектамі. Святлодыёдныя экраны арганічна ўпісалі ў архітэктурны ансамбль і размясцілі пад вуглом на 120 градусаў. Я папрашу рэжысёраў паказаць харэаграфічны пралог, з якога стартавала шоу, а таксама фрагменты інтэрв'ю з удзельнікамі канцэрта.

Яўген Курчыч, спявак: "Дзень Незалежнасці - гэта тое свята, якое аб'ядноўвае ўсю краіну, таму што гэта наша свята, гэта наша агульная Перамога, гэта памяць усіх пакаленняў. Мне давялося ў гэтым канцэрце паўдзельнічаць не толькі як артысту, але і як хормайстру ўсяго мерапрыемства. І, вядома, я магу сказаць, гэтае свята сучаснае, таму што з'явілася больш моладзі, з'явілася больш сучасных гукаў, мелодый, і гэта ўжо гаворыць пра многае".

Аляксандр Саладуха, заслужаны артыст Беларусі: "Для мяне гэтае свята 3 Ліпеня - Дзень Рэспублікі Беларусь - першым чынам гэта мае бацькі, тата і мама. Саладуха Антон Максімавіч, выхадзец горада Баранавічы, які адслужыў 26 гадоў у радах УС СССР. Мая мама родам з-пад Копыля, настаўніца, Раеўская Алена Зінонаўна, вядома ж, гэта мая каханая жанчына, мая жонка Наташа, гэта нашы дзеці - іх у нас чацвёра, гэта нашы ўнукі - іх у нас пяцёра на сённяшні дзень. Вядома ж, гэта ўвесь беларускі народ, родная зямля, менавіта тут маё месца, тут трэба працаваць, што я і раблю".

На адкрытай пляцоўцы ў цэнтры горада выступаюць як народныя і заслужаныя артысты, так і прадстаўнікі новай сучаснай хвалі. Пад кожнага з артыстаў распрацавалі індывідуальны відэакантэнт і сцэнаграфію. 

І мы не памыліліся, калі сказалі, што кульмінацый у вечара будзе дзве. Размова зараз пра штогадовую рэспубліканскую акцыю "Праспяваем гімн разам". Традыцыя з'явілася ў 2007 годзе. Акцыя аб'ядноўвае ўсе абласныя і раённыя цэнтры. А ў 23 гадзіны неба над Мінскам расфарбуе феерверк. Вогненнае шоу пакажуць у васьмі пунктах Мінска. Але і на гэтым праграма не сканчаецца. Пасля салюту ўсіх чакае танцавальнае аддзяленне - тут, ля стэлы. Так што не прапусціце.