Сустрэцца з землякамі на сваю малую радзіму прыехаў Руслан Аляхно і запрасіў з сабою россып зорак расійскай і беларускай эстрады. У канцэрце-тэлемарафоне "По зову сердца - всем миром" прымаюць удзел Анатоль Ярмоленка, Ядзвіга Паплаўская, Дзіяна Гурцкая і шматлікія іншыя. Усе сабраныя сродкі пойдуць на рэканструкцыю Бабруйскай гарадской дзіцячай бальніцы.
Аб добрай справе, якая аб'ядноўвае, - Вольга Мядзведзь. Сёлета гарадская бальніца для пацыентаў ад нараджэння да 18 гадоў святкуе юбілей. 55 гадоў у медыцынскім страі. Аднак за гэты час будынак прыйшоў фактычна ў аварыйны стан. І гэта прытым, што штогод установа прымае каля 6000 пацыентаў. За фінансаванне з абласнога бюджэту адрэстаўрыравалі найважнейшы - рэанімацыйны блок.
Галоўны медыяхолдынг краіны далучыўся да дабрачыннай акцыі. Увесь дзень "Беларусь 2" праводзіць тэлемарафон. У эфіры другой кнопкі тэматычныя выпускі, пачынаючы з "Тэлераніцы", прамыя ўключэнні з Бабруйска, а падчас "Пін_кода" дзіцячай бальніцы ў рэжыме рэальнага часу падарылі рэанімабіль.
Ідэйным натхніцелем акцыі "По зову сердца - всем миром" стаў бабруйчанін Руслан Аляхно. Спявак, які зараз жыве на два гарады, Бабруйск і Маскву, у Год малой радзімы вырашыў дапамагчы медыцынскай установе, у якой і сам калісьці праходзіў аздараўленне.
Паўдзельнічаць у дабрачыннай акцыі, накіраванай на збор сродкаў для рэстаўрацыі Бабруйскай дзіцячай бальніцы, можа кожны, адправіўшы сродкі на рахунак.
Свой дабрачынны забег здзейснілі і прадстаўнікі дыпмісіі. На футбольным полі сустрэліся зборная дэлегатаў ад пасольстваў Расіі, Таджыкістана, Славакіі, Пакістана і каманда Бабруйска на чале са старшынёй гарвыканкама. Акрамя агітацыйнай гульні, кожнае пасольства прадумвае і крокі фінансавай дапамогі.
Перш чым сысціся на таварыскім матчы, у якім, дарэчы, перамогу атрымаў Бабруйск, дыпламаты сустрэліся ў звыклым афіцыйным рэжыме.
Завяршыў марафон маштабны канцэрт у Лядовай арэне. Падтрымаць дзіцячую бальніцу прыехалі беларускія і расійскія зоркі эстрады. А тыя, хто на гастролях у Беларусі, як у сябе дома, але сёння не змаглі прысутнічаць на канцэрце, даслалі відэавіншаванні. Тэлеверсію дабрачыннага вечара глядзіце сёння ў 22:05 на "Беларусь 2".