Тэма, якая для ўсяго свету ў гэтыя дні становіцца самай актуальнай, - бяспека кожнай дзяржавы і людзей у прыватнасці. Тэракты ў Парыжы, у Бейруце, на борце расійскага аэробуса - усе гэтыя падзеі адкарэкціравалі не толькі зводкі стужак навін, але і палітыку многіх краін у гэтым аспекце. Еўропа ўзмацняе меры бяспекі, на вакзалах і ў аэрапортах строгі пагранічны кантроль. Супрацьстаянне тэрарызму актыўна вядзецца і ў нашай краіне. У першую чаргу ўвага надаецца мяжы. Сёння ў рамках сумеснага праекта ЕС - ПРААН у Смаргоні адкрылі казарму ў вучэбным цэнтры Інстытута пагранічнай службы. Рэканструкцыя была праведзеная з мэтай павышэння ўзроўню навучання і як вынік - якасці працы ў пунктах пропуску. Такое ўзаемадзеянне з арганізацыямі дазваляе ўзмацніць пагранічную бяспеку.
Расказвае Юрый Шаўчук.
Гэта далёка не першы сумесны вопыт Дзяржпагранкамітэта Беларусі, Еўрасаюза і ААН. Сімвалічная пунсовая стужка перарэзаная, а гэта значыць, што рэалізаваны адзін з самых амбіцыйных праектаў шматвектарнага партнёрства. Калісьці тут была паўразбураная казарма, але дзякуючы сумесным намаганням на яе месцы вырас новы сучасны корпус. Ён абсталяваны па апошнім слове тэхнікі - вучоба ў цэнтры пры Інстытуце пагранічных войскаў закіпела з новай сілай.
Госці разам з кіраўніком ведамства Леанідам Мальцавым уважліва знаёмяцца з усімі класамі і пакоямі корпуса. У будучыні тут змогуць павышаць свой узровень прафесійнага майстэрства адначасова амаль 100 прапаршчыкаў. На думку кіраўніцтва ДПК, супрацоўніцтва з міжнароднымі арганізацыямі дазваляе ўзмацніць пагранічную бяспеку не толькі нашай краіны, але і без сумнення ўсёй Еўропы.
Леанід Мальцаў, Старшыня ДПК Беларусі: "Гэта сапраўды сумесны праект. Што ён дае? Вядома, ён дае для нас сур'ёзную матэрыяльную базу, у дадзеным выпадку - для павышэння якасці навучання. А мы, павышаючы якасць навучання, павышаем якасць працы і на пунктах пропуску, і на зялёнай мяжы, і ў аператыўна-вышуковай дзейнасці, і ў ідэалогіі".
Толькі ў 2015 годзе Дзяржпагранкамітэту міжнародныя арганізацыі аказалі дапамогу амаль на 3 мільёны еўра. Акрамя рэканструкцыі навучальнага корпуса, гэта закупка абсталявання і тэхнікі для вучэбных класаў Інстытута пагранслужбы, а таксама навучанне нашых спецыялістаў. На 2016 год ужо падпісаныя праекты на 2 мільёны еўра. У такі няпросты час, як сёння, такое партнёрства ДПК Беларусі і Еўрасаюза - выдатны прыклад таго, як трэба вырашаць агульныя праблемы.
Андрэа Віктарын, кіраўнік прадстаўніцтва Еўрасаюза ў Беларусі: "Многія віды дзейнасці ўзязаныя з мэтамі ў галіне ўстойлівага развіцця. У нас зараз рэалізуюцца два праекты. Гэта АМБЕЛ і праект на ўкраінскай мяжы, а таксама рэалізуецца флагманская ініцыятыва ў рамках "Усходняга партнёрства". Усё выконваецца як на рэгіянальным, так і на нацыянальным узроўні. І мы гатовыя працягваць супрацоўніцтва".
А агульных праблем зараз шмат. Галоўныя з іх - наркатрафік і міграцыя. Нібы папрок фундаментальным прынцыпам ЕС прагучала інфармацыя афіцыйнага Осла - Нарвегія закрывае мяжу ўнутры Шэнгенскай зоны. На такое рашэнне ўлады краіны вымусіла нібы сітуацыя з бежанцамі. Паток мігрантаў працягвае расці. У сваю чаргу Швецыя, якая рашылася на такія меры яшчэ раней, мае намер падоўжыць пагранічны кантроль яшчэ на 20 дзён.
Санака Самарасінха, пастаянны каардынатар ААН, прадстаўнік ПРААН у Беларусі: "Ёсць 17 мэтаў у галіне ўстойлівага развіцця, якія краіны дамовіліся дасягнуць на працягу наступных 15 гадоў. У тым ліку пад гэтым дагаворам падпісаўся і Прэзідэнт Беларусі. І ААН гатовая дапамагчы вашай краіне ў дасягненні гэтых мэтаў. Больш за тое, ніводная краіна не павінна нават спрабаваць самастойна дасягнуць гэтага".
З пачатку ўзброенага канфлікту ва Украіне Беларусь, паводле ацэнкі ААН, заняла першае месца ў свеце па колькасці ўкраінскіх мігрантаў на душу насельніцтва. З поўдня да нас прыехалі больш чым 100 тысяч чалавек. І наша краіна паказала выдатны прыклад гасціннасці.
