Спаборніцтвы па скораснай зборцы кубіка Рубіка прайшлі ў Вілейцы

Сусветны рэкорд па зборцы класічнага кубіка Рубіка - тры з паловай секунды. У гэтыя выхадныя у Вілейцы юныя спідкуберы спрабавалі яго палепшыць. На чэмпіянат па скораснай зборцы кубіка Рубіка прыехалі удзельнікі з усёй Беларусі. Лепшага вызначалі ў чатырох намінацыях. За спаборніцтвамі сачыў Ілья Цвяткоў.

Каб спраектаваць і сабраць славуты рознакаляровы кубік, прафесару венгерскага універсітэта Эрнё Рубіку спатрэбіўся месяц. А вось Ілья Сяліцкі збірае галаваломку за 11 секунд. Упершыню апрабаваў інтэлектуальную гімнастыку, калі займаўся футболам.

У галаве трэба трымаць адначасова каля 20 базавых алгарытмаў. А каб падрыхтавацца да спаборніцтваў, запомніць трэба адразу каля сотні выкладак. 

У гэтыя выхадныя 50 кубераў розных узростаў з усёй краіны сабраліся ў Вілейцы, каб вызначыць лепшага ў чатырох дысцыплінах. 

Акрамя класічнага кубіка тры на тры тут збіраюць неверагодныя мнагаграннікі, піраміды і мегамінксы. Але самае цікавае, як высветлілася, кубік Рубіка збіраць можна не толькі ўручную. 

Каб паказаць выдатны вынік, неабходна добрая размінка. А для яе ідэальна падыходзіць кубік-малыш. Сумясціць на ім трэба больш за 700 элементаў. 

Такія спаборніцтвы маюць свой рэгламент. На кожную з чатырох відаў галаваломак удзельнікам даецца пяць спроб. Лепшы вынік трапляе ў турнірную табліцу. Куберы збіраюць галаваломкі ў прысутнасці секундантаў, якія кантралююць працэс і сочаць за часам. 

Уладзіслаў Шошын, арганізатар турніру па спідкубінгу: "Спачатку суддзя прыносіць вось такі гаршчок з кубікам. Далей пытаецца, ці гатовы ўдзельнік. І потым мне даецца 15 секунд на інспекцыю. Я вывучаю грані. Потым, калі праходзіць 8, 12, 15 секунд, пачынаецца час зборкі. Я пачынаю збіраць па таймеры".

Перамога ў трох намінацыях - класіка, два на два і мегамінкс - дасталася віртуозам-інтэлектуалам з Мінска. Пірамідку хутчэй за ўсё сабраў Уладзіслаў Пятніца з Наваполацка. Наступныя буйныя спаборніцтвы пройдуць напрыканцы верасня ў Віцебску. Статус міжнародны. Свае сілы паспрабуюць лепшыя куберы Беларусі, а таксама суседніх краін.