На перыяд паводкі ўсе службы жыццезабеспячэння Віцебшчыны перайшлі на кругласутачны рэжым працы. Вялікая вада пагражае жыхарам 10 раёнаў вобласці. Паводле апошняй інфармацыі, у рэгіёне падтопленыя 12 мастоў і ўчасткаў дарог, 34 жылыя дамы, 80 надворных пабудоў. Каб аб'ектыўна ацаніць паводкавую сітуацыю, сёння кіраўніцтву паўночнага рэгіёну прыйшлося падняцца ў паветра.
На верталёце МНС палятала і Алена Панцюхова. Сёння кіраўніцтва вобласці мае намер абляцець усе раёны Віцебшчыны, дзе зарэгістраваныя выпадкі падтаплення. Таму што толькі з верталёта можна атрымаць аб'ектыўную ацэнку паводкавай сітуацыі. Вышыня - 200 метраў, хуткасць - 150 кіламетраў за гадзіну. На борце верталёта галоўны ратавальнік вобласці і кіраўнік аграпрамысловага комплексу. Трэба ацаніць стан азімых, паглядзець, ці шмат вады стаіць на палях, ну і, вядома, ацаніць маштабы падтапленняў у пацярпелых ад паводкі рэгіёнах. Лёзненскі раён. У выніку павышэння ўзроўню вады ў рацэ Чэрніца пад вадой апынуўся аўтамабільны мост побач з вёскай Асіпенкі. А гэта ўжо Дубровеншчына, тут непрыемнасці прынёс Днепр. У раёне падтопленыя 6 жылых дамоў і 12 гаспадарчых пабудоў. У Віцебскім раёне, у паўночнай яго частцы, трывогу выклікае вялікая колькасць вады на палях. Вось тут, напрыклад, тэхніка зможа праехаць яшчэ не хутка. Галоўная выснова аблёту - надзвычайнай сітуацыі няма, але трэба быць напагатове. Узровень вады ў рэках Віцебшчыны працягвае расці. У Оршы, Верхнядзвінску і Шаркаўшчыне ён ужо перавысіў небяспечныя значэнні. Таму ўсе службы, адказныя за жыццезабеспячэнне насельніцтва, да канца паводкі будуць працаваць кругласутачна.