Сёння беларускія вытворцы ўпэўнена закрываюць патрэбнасць унутранага рынку. Да 80 % прадуктаў выраблены ў Беларусі, а па шэрагу найважнейшых таварных катэгорый (напрыклад, па мясе і малацэ) гэты паказчык і зусім дасягае 100 %.
Узровень самазабеспячэння Беларусі па мясе складае больш чым 130 %, па малочнай прадукцыі - звыш 260 %. У сярэднім на аднаго чалавека прыходзіцца 840 кг малака і яго вытворных, што ў 3-4 разы перавышае рэальнае спажыванне гэтага прадукту насельніцтвам.
У сярэднім адзін жыхар Беларусі за год спажывае 238 кг малака і малочных прадуктаў, 98 кг мяса і мясапрадуктаў. Таксама на аднаго беларуса ў сярэднім прыходзіцца 92 кг садавіны, ягад і прадуктаў іх перапрацоўкі, 174 кг гародніны і да 161 кг бульбы.
