Акрамя добра знаёмых «Аўтадрома», «Ладдзі», «Вальса», з'явіліся і новыя каруселі. У парку Чалюскінцаў - «Задыяк» - арэлі двайнога гушкання, а ў парку Горкага - «Міні-джэт». Акрамя гэтага, кожныя выхадныя па вечарах працуе танцавальная пляцоўка. Ужо хутка на свежым паветры пачнуцца заняткі па ёзе і гімнастыцы. Аляксандра Драгун з падрабязнасцямі.
Усе месцы на першы сеанс атракцыёна “Ладдзя” заняў адзін клас - амаль увесь 6 "Б". Пасля заняткаў вучні пайшлі ў парк Чалюскінцаў, каб разам адкрыць новы сезон арэляў.
Нягледзячы на пераменлівае надвор’е і кароткачасовы дождж, дзіцячы смех ужо чуваць у гарадскіх парках. Амаль паўсотні каруселяў закружыліся ў вальсе.
Атракцыёны, якія эксплуатуюцца больш за 10 гадоў, прайшлі поўны тэхнічны агляд. Акрамя добра вядомых “Аўтадрома”, “Дзікага цягніка”, “Вальса”, у гэтым сезоне з’явіліся і новыя каруселі. Напрыклад, “Міні-джэт” адкрыўся ў парку Горкага, а ў парку Чалюскінцаў – “Задыяк”.
Гушканне на арэлях не адзіная забава, якую прапануюць у парках Горкага, Чалюскінцаў і імя 900-годдзя Мінска. Напрыклад, увечары па выхадных запрашаюць на танцавальныя сустрэчы людзей рознага ўзросту.
Ад зімовай спячкі ўжо абудзіліся веласіпедысты і бегуны. Напрыканцы мая ў паркі прыйдуць і аматары ёгі. Раніцай пад спевы птушак будуць настройвацца на пазітыў. Для практыкаванняў падыдзе як зялёная паляна, так і асфальтаваная пляцоўка.
У календары запланаваныя як афіцыйныя падзеі, так і народныя гулянні. Сярод іх - фестываль калясак, пузпарад, Міжнародны дзень астраноміі і свята ратавальнікаў.
Лідзія Вежнавец, начальнік аддзела УП “Гарадскія паркі Мінскзелянбуда”: "Аркестры сёлета будуць у парку Горкага іграць у 3 гадзіны кожную нядзелю. 3 мая можна будзе сустрэцца з аркестрам "Няміга".
Сезон атракцыёнаў працягнецца да 30 верасня. Штодзень пагушкацца на арэлях у гарадскіх парках можна да дзевяці вечара, а ў святочныя і выхадныя дні да дзесяці.
