Шэры імпарт і кантрабанда кожны год наносяць бюджэту ўрон, які лічыцца мільярдамі рублёў. У гэтым святле гарантаваць высокую ступень кантролю і актыўна вынішчаць незаконнае перамяшчэнне тавараў праз мяжу - задача нумар адзін для мытных службаў Беларусі. Аб шэрых схемах і кантрабандным топе - рэпартаж Дзмітрыя Смірнова.
Планшэты, сумкі, адзенне, посуд, аўтамабільныя запчасткі. Мытныя склады амаль на ўсіх пунктах пропуску загружаны разнастайнай шэрай кантрабандай. І вось толькі адзін факт - айфоны ўваходзяць у топ самых папулярных аб'ектаў нелегальнага трафіку.
Юлія Раманюк, старшы інспектар Гродзенскай рэгіянальнай мытні: "У аўтамабілі, які рухаўся па зялёным канале пад кіраваннем грамадзяніна Рэспублікі Беларусь, быў выяўлены тайнік. У тайніку аўтамабіля перамяшчалі 10 мабільных тэлефонаў айфон 6. Тавар на суму 120 мільёнаў рублёў, які незаконна перамяшчаўся, а таксама аўтамабіль коштам 200 мільёнаў рублёў былі канфіскаваны".
Эксперты пацвярджаюць, людзі вязуць практычна ўсё, што мае цэнавую розніцу ў дзвюх краінах. І сума матэрыяльнага ўрону дзяржбюджэту павялічваецца.
Таму адна з асноўных задач мытнай службы - гарантаваць высокую ступень кантролю і актыўна вынішчаць кантрабанду. Пра гэта гаварыў і Кіраўнік дзяржавы на сустрэчы з цэнтральным апаратам камітэта. Узмацніць трэба і барацьбу са злачыннасцю. Акрамя традыцыйнай кантрабанды асаблівай пагрозай становяцца наркотыкі.
Імавернасць увозу кантрабанды павялічваецца з ростам аб'ёму міжнароднага гандлю. Шэрыя партыі ў велікагрузах выяўляе рэнтгенкомплекс. Дробныя пастаўкі спыняюць мытнікі асабіста.
Гэта і ёсць так званы шэры імпарт - чайнікі, прасы, навагоднія елкі і нават металашукальнікі. Пад выглядам асабістых рэчаў спрабуюць завезці самыя розныя тавары і ў самай рознай колькасці.
Днямі на беларуска-польскай мяжы мужчына ў асабістым аўто спрабаваў прывезці ў Беларусь ні шмат ні мала - 61 тысячу адзінак мэблевай фурнітуры. Зусім не збянтэжыўшыся, ён выбраў зялёны калідор, дзе тавар пры ўвозе не трэба дэклараваць. За такія парушэнні толькі ў пункце пропуску "Бераставіца" за тыдзень складаюць да 10 пратаколаў.
Аляксандр Таберка, начальнік мытнага паста "Бераставіца": "Грамадзянка не зрабіла дэклараванне і спрабавала перамясціць на тэрыторыю Рэспублікі Беларусь вялікую партыю тавараў - 127 прадметаў адзення, 8 планшэтаў, 4 батарэі для абагрэву бытавых памяшканняў".
