На варце энерганезалежнасці! Рэалізацыю стратэгічна важнага праекта - будаўніцтва нашай першай атамнай станцыі - сёння абмеркавалі на нарадзе ў Прэзідэнта.
Гэта адзін з самых маштабных, складаных і тэхналагічных аб'ектаў, якія ўзводзяцца ў кааперацыі з Расіяй. Першы энергаблок запушчаны ў работу некалькі гадоў назад. Зараз справа за другім. БелАЭС уносіць уклад у нашу энергетычную бяспеку і замяшчае мільярды кубаметраў газу. Запуск другога энергаблока зробіць Беларусь яшчэ мацнейшай! А таму Аляксандр Лукашэнка з асаблівай увагай сочыць за прасоўваннем праекта, яго выхадам на поўную магутнасць. Забяспечыць эфектыўную работу станцыі і пры гэтым вытрымаць усе патрабаванні бяспекі - найважнейшыя арыенціры.
З запускам БелАЭС Беларусь стала паўнапраўным удзельнікам сусветнага клуба атамных дзяржаў, якія выкарыстоўваюць энергію атама ў мірных мэтах. Тым самым краіна атрымлівае экалагічна чыстую і, што важна, уласную крыніцу энергіі, якая дазваляе забяспечыць каля 40 % унутраных патрэбнасцяў. У пералічэнні на долары і кубаметры - гэта прыкметная эканомія: станцыя ўжо замяніла звыш трох мільярдаў кубічных метраў газу і дазволіла зберагчы больш за 400 млн долараў. Далей - больш! Але Прэзідэнт заклікае не гнацца за тэрмінамі. Прынамсі, не ва ўрон якасці!
Другі энергаблок БелАЭС гатовы на 98 %, паведаміў сёння кіраўнік Мінэнерга. Першае выпрабавальнае ўключэнне ў сетку плануецца ў красавіку (пры магутнасці рэактарнай устаноўкі 40 %). Поўную гатоўнасць абяцаюць у кастрычніку, што адпавядае праграме прамысловага ўводу станцыі ў эксплуатацыю.
