Таму не за гарамі час, калі грамадзянам, якія не паспелі выкупіць у дзяржавы сваю жылплошчу, прапануюць жыць у арэндных кватэрах. Насельніцтва ўспрыняла навіну літаральна, у выканкамах небывалыя чэргі ахвотнікаў стаць уласнікамі сваёй кватэры не толькі на справе, але і на паперы.
Падрабязнасці ў Наталлі Кузьміцкай.
Яшчэ нейкі месяц таму гэтая лічба была ў дзесяць разоў меншая, зараз жа ў службах Адно акно нават самых невялікіх раёнаў па шчыльнасці жылфонду, часам не праціснуцца.
Анастасія Сабірай, начальнік аддзела жыллёвай палітыкі адміністрацыі Цэнтральнага раёна г. Мінска: Пішуць заяву, ёсць распрацаваная форма. Называецца адрас кватэры, плошча кватэры, таксама колькасць грамадзян, хто прымае ўдзел у прыватызацыі кватэры, а хто не.
Наплыў тых, хто займаецца прыватызацыяй, і ў агенцтве па рэгістрацыі і зямельным кадастры. Спачатку тут выдаюць даведку аб тэхнічных характарыстыках жылля, а ўжо пасля ўсіх адміністрацыйных працэдур пасведчанне аб дзяржаўнай рэгістрацыі.
Сяргей Сянчук, намеснік дырэктара РУП Мінскае гарадское агенцтва па дзяржаўнай рэгістрацыі і зямельным кадастры: Г.з мы рыхтуем спачатку даведку, людзі ідуць у адміністрацыю, атрымліваюць рашэнне аб прыватызацыі, затым яны ідуць да натарыуса з выпіскай дазволу, афармляюць натарыяльна завераны дагавор аб прыватызацыі і ўжо пасля таго, як ёсць на руках дагавор аб прыватызацыі, людзі прыходзяць у наша агенцтва.
Але, мабыць, найважнейшае пытанне - грашовае. Згодна з падлікамі спецыялістаў, прыватызацыя 1-пакаёвай і 2- пакаёвай кватэр будзе каштаваць ад 15 да 20% ад яе рыначнага кошту. Выкупіць кватэру ў дзяржавы можна трыма спосабамі. Першы, пагасіўшы ўвесь кошт жылля адным плацяжом, другі, узяўшы растэрміноўку на 40 гадоў, пры гэтым аплаціўшы 10% ад усяго кошту ў першы год, і трэці спосаб, з дапамогай чэкаў Жыллё для тых, у каго яны заляжаліся. Кошт чэка пры прыватызацыі кватэры ў панэльным доме складзе 93, а ў цагляным 67 тысяч беларускіх рублёў.
Важна памятаць, што да поўнага пагашэння доўгу з кватэрай нельга будзе ажыццяўляць ніякіх здзелак і аперацый. Згодна з падлікамі спецыялістаў, непрыватызаванага жылля засталося каля 20%. Прыкладна палова ад гэтай колькасці будзе прыватызаваная, астатняя частка будзе пераведзеная ў статус арэнднага альбо жылля сацыяльнага карыстання.
Для тых, хто яшчэ не вырашыў, пад якім дахам хоча жыць - сваім або дзяржаўным - ёсць час падумаць. Вядома, што ў прапанаваным праекце ўказа прадугледжваецца адтэрміноўка. Пасля падпісання дакумента прыватызаваць жыллё можна будзе на працягу года.
