Прафесійныя навыкі дэманстравалі на тыдні юныя майстры на WorldSkills Belarus - 2020

Гасцей прымаў Кітайска-беларускі індустрыяльны парк "Вялікі камень". Сюды прыехалі больш за 320 удзельнікаў з усёй краіны. Канкурсантам сапраўды ёсць за што змагацца - гэта не толькі званне лепшага, але і паездка ў Кітай. Чым сёлета здзіўлялі ўдзельнікі, раскажа Юлія Хмель. 

На старт, увага, марш - і ў імправізаваных цэхах пачуліся гукі рабочых інструментаў, павеяла пахам незвычайных страў і на вачах нараджаліся прыгожыя прычоскі. Так пачынаюцца спаборніцтвы юных майстроў 4-га Рэспубліканскага конкурсу прафесійнага майстэрства  WorldSkills Belarus - 2020.

Дар'я Іванчыкава і Мікіта Шэлегаў працуюць у камандзе. У канкурсантаў кампетэнцыя «Рэстаранны сэрвіс». Згодна з заданнем, ім трэба падрыхтавацца да банкету. А нюансаў шмат. Гэта і чысціня залы, знешні выгляд персаналу, правілы падачы страў і сустрэча гасцей. І ўсе гэтыя стандарты ўдзельнікі ведаюць на памяць. 

Гасцей нацыянальнага конкурсу прымае Кітайска-беларускі індустрыяльны парк «Вялікі камень». Сюды з'ехаліся 325 канкурсантаў ва ўзросце да 21 года з усіх рэгіёнаў нашай краіны. Сярод удзельнікаў і юныя майстры з асаблівасцямі развіцця. Аднак гэта не перашкаджае ім ствараць шэдэўры. 

Усяго ў праграме конкурсу - спаборніцтвы па 47-мі прафесійных кампетэнцыях. Упершыню прадстаўлена «Пачатковая адукацыя». Сёння прафесія настаўніка патрабуе пастаяннага павышэння педагагічнага майстэрства з улікам патрабаванняў часу. Таму ў навучальным працэсе актыўна выкарыстоўваюцца IT-распрацоўкі. 

Лепшыя ў сваёй сферы не проста атрымаюць званне майстра на ўсе рукі. Пераможцы рэспубліканскага конкурсу адправяцца ў Кітай на 46-ты чэмпіянат свету па прафесійным майстэрстве WorldSkills-2021, дзе змогуць прадэманстраваць свой прафесіяналізм па-беларуску.