Праблемныя пытанні ў будаўнічай галіне працягвае вырашаць рабочая група, створаная па даручэнні Прэзідэнта. Спецыялісты працавалі і ў выхадныя. У суботу гаварылі аб якасці працы з фундатарамі ў сферы будаўніцтва. Ці ўсё створана для іх камфортнай працы, якія праблемы існуюць для ахвочых інвесціраваць у Беларусь. Таксама камісія закранула пытанне адказнасці, у тым ліку і эканамічнай, усіх удзельнікаў працэсу будаўніцтва.
Вадзім Шчаглоў з падрабязнасцямі. Яшчэ ў пачатку пасяджэння кіраўнік Адміністрацыі Прэзідэнта пажартаваў, што субота адрозніваецца ад астатніх дзён адсутнасцю абеду на працы, настроіўшы тым самым прысутных на сур'ёзную гутарку. Абавязвала сама тэма сустрэчы - Праблемы кіравання інвестыцыйным цыклам у будаўніцтве. Члены камісіі заклапаціліся сітуацыяй, калі фундатар з грашыма, сутыкаючыся з бюракратычнымі перашкодамі, можа сысці з рынку, так і не рэалізаваўшы будаўнічы праект. Сёння прыходзіцца на этапе ўзгаднення праекта хадзіць па інстанцыях 2-3 разы. І не маючы ў пачатку ніякіх патрабаванняў па сваім аб'екце, можна атрымаць цэлы спіс дадатковых патрабаванняў.
Сярод першых прапаноў па аптымізацыі інвестыцыйнага працэсу ў будаўніцтве - увядзенне ўніфікаванай блок-схемы гэтага працэсу. Інвестпраект дзеліцца на 4 этапы: выбар месца размяшчэння зямельнага ўчастку, адвод і праектаванне. Будаўніцтва і ўвод у эксплуатацыю. Андрэй Кабякоў звярнуў увагу на тое, што фундатару не заўсёды хапае інфармацыі, каб адразу выбраць участак. Разумна было б дапамагчы.
Прапанавана дапоўніць прапанаваную ўніфікаваную блок-схему выразнымі патрабаваннямі для фундатара - з дакладным алгарытмам дзеянняў. На думку Андрэя Кабякова, толькі такі падыход дапаможа пазбегнуць у далейшым блытаніны. На сёння 70% тэрыторыі сталіцы ахопленыя дэталёвай планіроўкай, на астатняй трэці фундатарам некалькі складана арыентавацца. На думку кіраўніка адміністрацыі, важнае пытанне кошт - якасць. Ці атрымае дзяржава аддачу, зрабіўшы адным махам планіроўку, якая адсутнічае.
Другая частка нарады была прысвечаная пытанням павышэння адказнасці ўдзельнікаў інвестыцыйнага працэсу ў будаўніцтве. Лібералізацыя эканомікі павінна выключаць у той жа час магчымасць для махінацый. Прапаноўваецца ўвядзенне прамой адміністрацыйнай адказнасці для прадстаўнікоў тэхнічнага і аўтарскага нагляду, увядзенне эканамічнай адказнасці за падпісанне службовымі асобамі заказчыка і падрадчыка дакументаў здачы і прыёмкі работ, выкананых з парушэннямі патрабаванняў праекта, і тэхнічных нарматыўных прававых актаў. Увядзенне адміністрацыйнай адказнасці за неправамерную выдачу службовымі асобамі гарадскіх і эксплуатацыйных арганізацый пры прыёмцы аб'ектаў даведак аб тым, што парушаныя камунікацыі забяспечаць нармальную эксплуатацыю аб'екта.
Наступнае пасяджэнне камісіі адбудзецца ў аўторак. На ім будуць разгледжаныя прапановы па працы Гродзенскага аблвыканкама.
