Прадстаўнікі расійскіх і беларускіх СМІ абмяркуюць у Ніжнім Ноўгарадзе перспектывы ўзаемадзеяння краін у сферы атамнай энергетыкі. За тры дні журналісты наведалі вядучыя ўстановы адукацыі, якія рыхтуюць спецыялістаў, у тым ліку і для беларускай АЭС. Пагутарылі з навукоўцамі, пазнаёміліся з перадавымі тэхналогіямі. Чым яшчэ запомніўся прэс-тур - у рэпартажы Андрэя Ястрабава.
Гэты дзеючы макет атамнай усталёўкі - адзіны ў Расіі. Лабараторыя знакамітага ўніверсітэта імя Аляксеева, які рыхтуе спецыялістаў для электрастанцый, атамных падводных лодак і ледаколаў. Трэці год тут супрацоўнічаюць і з Беларуссю.
Такія перспектывы для навукоўцаў Беларусі адкрыліся дзякуючы саюзным адносінам дзвюх краін. Аб гэтым гаварылі і падчас сустрэчы журналістаў з урадам у Ніжагародскім крамлі.
Сустрэча з адміністрацыяй Ніжагародскай вобласці фактычна адкрыла афіцыйную частку тура. Спытаць адзін у аднаго было аб чым. Напрыклад, аб супрацоўніцтве Ніжняга Ноўгарада з Беларуссю і аб будаўніцтве атамнай электрастанцыі. Бо менавіта ў Ніжнім Ноўгарадзе рыхтуюць спецыялістаў для будучай АЭС.
Сёлета Беларусь заняла другое месца сярод 136 краін, якія супрацоўнічаюць з Ніжагародскай вобласцю. Цесныя адносіны з Гомсельмашам, Мінскім трактарным заводам. Ужо сёння абмяркоўваюцца перспектывы куплі беларускай дарожнай і будаўнічай тэхнікі, а таксама магілёўскіх ліфтоў. Межаў у сферах і галінах, паводле слоў спецыялістаў, няма.
Упершыню беларускім журналістам паказалі лабараторыі, дзе распрацавалі беларускую атамную электрастанцыю. Па задуме навукоўцаў, яна стане эталонам бяспекі. Сістэма кіравання прадухіліць любыя аварыі. Найноўшыя распрацоўкі ўкаранёныя ўжо на стадыі будаўніцтва. У рэжыме анлайн спецыялісты з Атамэнергапраекта- галоўнага падрадчыка - сочаць за ходам прац на пляцоўцы ў беларускім Астраўцы. Паводле іх слоў, усё праходзіць ідэальна.
Навукоўцы-атамшчыкі ўжо назвалі станцыю найважнейшым стратэгічным аб'ектам. Прычым, з пункта гледжання энергетычнай бяспекі - не толькі для Беларусі, але і для суседніх краін.
