У Беларусь прыйшла кліматычная і каляндарная зіма. Аматары рыбалкі ўжо адпраўляюцца на яшчэ не трывалы лёд. За імі ўважліва сочаць ратавальнікі Асвода і папярэджваюць: пакрыццё пакуль не вельмі моцнае, лепш пачакаць. Забава нумар адзін для дзяцей - катанне на цюбінгах - таксама пад узмоцненым кантролем. ДАІ дзяжурыць каля снежных горак, каб не дапусціць траўміравання падчас спускаў. А вадзіцелям рэкамендуюць прайсці курс экстрэмальнага кіравання на снежнай трасе, каб павысіць сваю ўпэўненасць за рулём і пазбегнуць ДТЗ. Правілы бяспечнай зімы распавёў Ілья Цвяткоў.
Снегу шмат не бывае, асабліва ў першыя дні каляндарнай зімы. У Мінску ўжо пануе атмасфера марознага настрою. Хтосьці расчышчае гурбы, каб выехаць з паркоўкі, дабрацца да працы і дамоў на аўто, а для некаторых такое надвор'е - сапраўдная радасць. Напрыклад, для юных заваёўнікаў гарадскіх снежных вяршынь.
Катанне на цюбінгах - папулярная забава для самых маленькіх беларусаў ужо не першы зімовы сезон. "Ватрушкі" - ідэальны атракцыён падчас марознага надвор'я, аднак не варта забываць пра тое, як правільна выкарыстоўваць гэты інвентар, каб пазбегнуць траўм.
Хуткасныя спускі на цюбінгах у снежныя дні на асаблівым кантролі ДАІ. Інспектары сочаць за з'яўленнем стыхійных горак каля праезнай часткі. Забавы ля дарогі прыводзяць да траўміравання і ДТЗ, таму супрацоўнікі даюць рэкамендацыі дзецям і бацькам: не парушаць правілы бяспекі і катацца ў абсталяваных месцах. Часцей за ўсё да траўм прыводзяць катанні "паравозікам", спускі ўдваіх на адной "ватрушцы" і прывязванне цюбінгаў да транспартных сродкаў.
Гурбы на дарогах дбайна ліквідуюць камунальныя службы ва ўсіх раёнах горада. Але толькі не на картынг-дыстанцыях. Зімовыя гонкі на міні-спорткарах - гэта асаблівы фармат заездаў. Снежнае пакрыццё на трасе дае адчуванне асаблівага экстрыму. Машыны падрыхтавалі да марознага сезона. Зараз можна ўпэўнена націскаць на педаль газу.
На картынг-базе інструктары вучаць хутка рэагаваць на складаныя дарожныя ўмовы, адчуваць рух усіх чатырох колаў. Лішні паварот руля - і карт ідзе ў занос, кожны рух трэба пралічваць загадзя. Такія навыкі дапамогуць нават самаму вопытнаму вадзіцелю адчуваць сябе за рулём аўто яшчэ больш упэўнена.
Перамесцімся бліжэй да вады. На акваторыях толькі пачынае фарміравацца першы, яшчэ крохкі, лёд, а аматары рыбнай лоўлі ўжо пракладваюць небяспечныя маршруты да цэнтра азёр і вадасховішчаў. Па іх слядах ідуць супрацоўнікі Асвода. Ратавальнікі нагадваюць: бяспечнай адзнакі - больш чым 7 см - таўшчыня лёду яшчэ не дасягнула.
Начальнік выратавальнай станцыі "Юбілейная" г. Гродна Яўген Кіман запэўніў, што супрацоўнікі Асвода кожны дзень праводзяць рэйдавыя мерапрыемствы па інструктажы рыбакоў: "Рыбак абавязкова павінен мець пры сабе выратавальную камізэльку, якую-небудзь вяроўку, каб у выпадку чаго было прасцей да яго падабрацца і яго дастаць, альпенштокі альбо цвікі, каб учапіцца за лёд у выпадку пралому".
Патэлефанаваць на найбліжэйшую выратавальную станцыю і даведацца пра стан лядовага пакрыцця абавязкова неабходна кожнаму рыбаку, перш чым выйсці на замерзлую ваду.
Лёд будзе паступова мацнець разам з маразамі. Сіноптыкі прагназуюць на тыдні з 4 па 10 снежня да мінус 18 градусаў.
Вікторыя Мацвеенка, інжынер-сіноптык Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя:
Арктычныя цыклоны працягваюць падарожжы па еўрапейскай тэрыторыі. У выніку кліматычны рэжым на гэтым тыдні будзе на 4-6 градусаў ніжэйшы за норму. Таксама не абыдзецца без ападкаў.
Таму настаў час добра ўцяпліцца. Парада ад супрацоўнікаў МНС: пры сабе падчас прагулкі на марозе мець тэрмас з гарачай гарбатай, насіць абутак на тоўстай падэшве і абавязкова апранаць рукавіцы і галаўны ўбор.
