Такая форма працы ўжо даказала сваю эфектыўнасць. Шматлікія пытанні паспяхова вырашаныя альбо ўзятыя на кантроль. Так, пасля звароту да старшыні Савета Рэспублікі ў аддаленай вёсцы Жукі з'явілася рачная пераправа, а ашуканай жыхарцы вёскі Налібокі дапамаглі аднавіць справядлівасць. Аб рэальнай, а не фармальнай працы са зваротамі грамадзян распавядзём у рубрыцы "Зваротная сувязь".
Расказвае Вольга Маслоўская.
Новая пераправа цераз раку Усвейка дзейнічае другі месяц. Жыхары вёскі Жукі ўспамінаюць: каб узвесці яе, давялося дайсці да старшыні Савета Рэспублікі.
На асабісты прыём да Наталлі Качанавай дэлегавалі Юрыя Карзінкіна. Просьбаў тады было некалькі: прывесці ў парадак дарогу, паставіць агароджу на могілкі, а самае галоўнае - паправіць мост, які шмат гадоў злучаў два берагі.
Для вяскоўцаў пераправа - аб'ект стратэгічны. На іншым беразе прыпынак аўтобуса, магазін, ФАП, ляснікоўства. Напрасткі цераз раку не больш за 5 кіламетраў, а без моста крук амаль у шэсць.
Улетку абмялелую раку пераходзілі ўброд, а з наступленнем халадоў пытанне магло стаць праблемным. Наталля Качанава просьбу вяскоўцаў адрасавала мясцовым уладам з выразным даручэннем выканаць. Праца пачалася праз месяц.
Усе пункты калектыўнага звароту жыхароў вёскі Жукі выкананыя: дарогу паправілі, а агароджа могілкаў - справа часу. Матэрыял ужо закуплены. У цэлым трэць скаргаў, якія жыхары Чашніцкага раёна накіроўваюць у мясцовы выканкам, датычацца дарожнай гаспадаркі і сістэмы ЖКГ. Праблемныя пытанні вырашаюць.
Як вада ў пясок, ледзь не сышлі зберажэнні пенсіянеркі з вёскі Налібокі, калі ў дом да Тамары Дубровай прыйшлі незнаёмцы і прадставіліся працаўнікамі вадаканала. Прапанавалі ўсталяваць сістэму ачысткі вады з 50-працэнтнай скідкай. Папрасілі заплаціць больш як 200 рублёў.
Толькі пасля сыходу няпрошаных гасцей Тамара Мікалаеўна зразумела, што стала ахвярай падману. Паспрабавала скасаваць дамову, звярталася ў міліцыю. Адказ быў адзін: дакумент падпісаны і ануляваць яго можна толькі праз суд. Тады жанчына напісала ліст з просьбай аб дапамозе ў Савет Рэспублікі. Да вырашэння праблемы падключылася і пракуратура. Грошы так званым бізнесменам прыйшлося вярнуць.
Праца са зваротамі грамадзян - адзін з галоўных кірункаў дзейнасці сенатараў. З пачатку года ў Савет Рэспублікі ад беларусаў паступіла парадку 5 тысяч просьбаў. Плюс дыялогавыя пляцоўкі, сустрэчы ў калектывах, новая форма працы - адзіныя дні прыёму грамадзян у рэгіёнах. Добрыя ініцыятывы сенатары выкарыстоўваюць у працы над законапраектамі і ў дадатак да дзеючых норм.