Пасля шасці месяцаў баскетбольных баталій пляцоўку ля Палаца спорту зноў пакрыюць лёдам. Ужо заўтра мабільны каток прыме першых наведвальнікаў. Зараз ідзе апошняя падрыхтоўка лядовай арэны і наладка маразільнага абсталявання. Ян Пашкевіч праверыў на трываласць новы лёд.
Мікалай Торшын за жыццё пабудаваў больш за дзесяць лядовых арэн у Беларусі і Расіі. Сёння дасведчаны спецыяліст на заслужаным адпачынку, але любімай справы не пакінуў. Вось і зараз займаецца падрыхтоўкай мабільнага катка да новага сезона – правярае на трываласць амаль 27 кіламетраў труб сістэмы астуджэння.
Астуджальная сетка складаецца з дзвюх частак – кожная з іх пакрывае больш як тысячу квадратных метраў пляцоўкі. Помпы бесперапынна перамяшчаюць па гэтых магістралях антыфрыз, астуджаны да -10 градусаў. Атрымліваецца міні-ледніковы перыяд нават у +20.
Гэта фабрыка лёду працуе як звычайны халадзільнік – забірае цяпло з антыфрызу і вяртае вадкасць у сістэму. Потым на працягу чатырох дзён поле паэтапна заліваюць вадой - патрэбна амаль 17 тысяч літраў.
Ад вострых канькоў трубы хаваюць пад лёдам таўшчынёй не менш як 4 сантыметры. Паколькі падчас сеанса катання на арэну выходзіць звыш 50 спартсменаў-аматараў, пакрыццё неабходна прыбіраць і рэстаўраваць кожныя 45 хвілін.
У перапынках паміж сеансамі катання на пляцоўцы з’яўляецца вось такая машына – яна прыводзіць лёд у належны стан. Збірае ўсю крошку з поля і адначасова залівае паверхню гарачай вадой - тэмпература не вышэйшая за 70 градусаў.
Такім чынам лядовае люстэрка нязначна растае і праз некалькі хвілін зноў становіцца гладкім і роўным. Адкрыць лядовы сезон на мабільным катку ля Палаца спорту плануюць у пятніцу – 23 кастрычніка. Аматары зімовай забавы змогуць атрымліваць асалоду ад хуткага катання кожны дзень з 11 раніцы да 11 вечара.
