Свята вясны ці Новы год па-кітайску! Жыхары гэтай краіны і ўсе аматары ўсходняй культуры ў прадчуванні кульмінацыі зімовых урачыстасцяў. Новы год будуць сустракаць сёння ў ноч на 10 лютага. А затым святочны настрой і антураж будуць панаваць яшчэ на працягу двух тыдняў.
Паводле традыцыі жыхары гэтай краіны і захавальнікі кітайскай спадчыны адзначаюць Новы год два разы за сезон: спачатку разам з усім светам - у ноч на 1 студзеня, а потым па ўсходнім календары. Падрабязнасці ў Аляксандры Гойтан.
Каларыт кітайскага Новага года
Каларыт Паднябеснай - цяпло хатняга ачага, душэўныя размовы, багацце і магія ўсходняй спадчыны. 8-мы год Клуб кітайскай культуры "Цан Цзэ" дае магчымасць стаць бліжэй да самабытнай Азіі. Сярод актыўных удзельнікаў - носьбіты традыцый, для якіх Беларусь стала другой радзімай.
Ку Вэйпэн - мастак, аспірант беларускай дзяржаўнай акадэміі мастацтваў:
Я доўга аналізаваў - выбіраў далейшае месца вучобы паміж Беларуссю і іншымі краінамі Еўропы, спыніўся на Мінску, бо тут выдатнае навакольнае асяроддзе, спагадлівыя і добрыя людзі. Таксама паўплываў на мой выбар і высокі ўзровень адукацыйнай базы ў Акадэміі мастацтваў.
Тут аднолькава шануюць як беларускія, так і кітайскія святы, якія і задаюць тэму для новых сустрэч. Ад майстар-класаў па кітайскім баявым мастацтве і лекцый па шанхайскім джазе да выстаў жывапісу і фатаграфій. Гэта сустрэча асабліва ўрачыстая - прысвечана легендам, гісторыі і традыцыям кітайскага Новага года.
У навагоднім аздабленні кітайскага свята цэнтральнае месца займае чырвоны колер і іерогліф - шчасце. Такімі самаробнымі гірляндамі ўпрыгожваюць дзверы жылля.
Юй Вэй акунае мяккі пэндзаль у адмысловую туш і лёгкімі мазкамі на рысавых аркушах з выявамі дракона і фенікса выводзіць лініі розных памераў і таўшчыні.
Акрамя страў і дэкору, які прываблівае дабрабыт, важны і дрэс-код.
Дзін Юньгэ, магістрантка Беларускага дзяржаўнага ўніверсітэта культуры і мастацтваў:
Я апранула нацыянальнае кітайскае адзенне, якое мае назву - цыпао. Таксама я зрабіла прычоску пры дапамозе нашай традыцыйнай заколкі ў кітайскім стылі
Жыхары Паднябеснай святкуюць Новы год два разы: спачатку па грыгарыянскім календары - у ноч на 1 студзеня, а потым яшчэ і па ўсходнім. Штосезон дата апошняга мяняецца.
З прыходам Новага года Дракон праявіць сябе на поўную моц, ваду зменіць дрэва - галоўная стыхія. Дакрануцца на шчасце да велічнага сімвала 2024-га прапануюць у Кітайска-беларускім індустрыяльным парку. Акурат да свята там усталявалі каларытнага сіняга дракона вышынёй больш за 2 метры.
Гэты міфічны герой адрозніваецца сваёй яркасцю і харызмай, а яшчэ лічыцца сімвалам сілы і мудрасці. Чатырохметровы дракон у аўтарскім выкананні стане новай лакацыяй для сэлфі і новых легенд.
