Платную паркоўку адкрыюць з 1 верасня ўздоўж праспекта Незалежнасці, а таксама на вуліцах Талбухіна і Кедышкі. 270 аўто змогуць размясціцца на ёй адначасова. Даведацца аб наяўнасці свабодных месцаў вадзіцелям дапамогуць спецыяльныя табло. Будзе доступ і да бясплатнага Wi-Fi. Як можна аплаціць месца на паркоўцы, колькі будзе каштаваць гадзіна стаянкі – раскажа Аляксандр Харавец.
Сёння зона платнай паркоўкі ў межах праспекта Незалежнасці і вуліцы Талбухіна праходзіць апошнія іспыты. З наступнага тыдня яна запрацуе ў тэставым рэжыме. Усё ж спецыялістам патрэбны пэўны час, каб наладзіць абсталяванне. А таму пакуль што за парушэнне правілаў нікога не штрафуюць.
Убачыць наяўнасць свабодных парковачных месцаў вадзіцелі змогуць на спецыяльных святлодыёдных табло. І на кожным з іх будуць адлюстроўвацца незанятыя месцы на вуліцы Талбухіна, а таксама з двух бакоў праспекта Незалежнасці.
Адначасова на паркоўцы змогуць размясціцца 100 аўтамабіляў. Кошт стаянкі за гадзіну - 10 тысяч рублёў. Каб аплаціць стаянку, у аўтаўладальніка маса варыянтаў – паркамат, плацежны тэрмінал, смс-паведамленне або спецыяльны мабільны дадатак. Таксама можна праз адзіную разліковую інфармацыйную прастору, інтэрнэт-банкінг, банкамат або аддзяленне банка.
Такім чынам сістэма будзе цалкам аўтаматызаванай. Гэта выключае любыя памылкі і факты неаплаты. Кантраляваць гэты працэс будуць інспектары паркоўкі з дапамогай планшэтаў.
Усе факты неаплаты спецыялісты падсумоўваюць і перадаюць у ДАІ. Праваахоўнікі пачынаюць адміністрацыйны працэс – і аўтаўладальнікаў, якія не аплацілі стаянку, чакаюць так званыя лісты шчасця. А вось з плюсаў інавацыйнай паркоўкі – бясплатны Wi-Fi, якім могуць карыстацца не толькі вадзіцелі, але і мінчане, што адпачываюць побач у скверы.
