Амаль дарослая гутарка аб уроках гісторыі, узнагароды за поспехі ў вучобе і навуцы і, вядома, падарункі да Новага года. Адным адрасам рэспубліканскай дабрачыннай акцыі "Нашы дзеці" стала больш, выхаванцы Віцебскага кадэцкага вучылішча сёння сустракалі старшыню Дзяржаўнага камітэта па навуцы і тэхналогіях Аляксандра Шуміліна. Сяброўству гэтай навучальнай установы і камітэта ўжо 7 гадоў. За гэты час бібліятэка вучылішча папоўнілася рэдкімі кнігамі аб гісторыі Другой сусветнай вайны, развіцці тэхналогій і зброі. Багацейшай стала і матэрыяльна-тэхнічная база: сертыфікат на набыццё неабходнай тэхнікі Аляксандр Шумілін падарыў калектыву сёння.
Дар'я Ягадка, кадэт Віцебскага кадэцкага вучылішча: "Ад гэтай сустрэчы мы чакаем для сябе новую інфармацыю, якую зможам у далейшым выкарыстаць. Я планую паступаць у Акадэмію МУС на следча-экспертны факультэт, але апроч гэтага планую займацца навукова-практычнай дзейнасцю".
Аляксандр Шумілін, старшыня Дзяржаўнага камітэта па навуцы і тэхналогіях Беларусі: "Заўсёды сустрэча з моладдзю, з дзецьмі - гэта станоўчыя эмоцыі. Гэта наша будучыня, тым больш, кадэты - патрыёты, якія ўжо з дзяцінства вучацца і збіраюцца звязаць сваё жыццё з абаронай Бацькаўшчыны. Сёння няма нічога больш высакароднага, чым абарона Айчыны".
У Віцебскім кадэцкім вучылішчы навучаюцца 275 юнакоў і дзяўчат. З адоранымі дзецьмі працуюць 50 педагогаў і выхавальнікаў. Сёлета каманда выхаванцаў вучылішча стала пяціразовым пераможцам рэспубліканскай інтэлектуальна-творчай алімпіяды "Патрыёт".
