Адразу пасля першага званка пачаліся навучальныя зборы ў першакурснікаў Ваеннай акадэміі Беларусі. На працягу трох дзён курсанты будуць знаходзіцца на палігоне Белая Лужа ў Слуцкім раёне. Стральба з акопаў, устаноўка мінаў, падрыванне бранятэхнікі - усе заданні для курсантаў максімальна набліжаныя да сапраўдных баявых умоў.
Расказвае Юрый Шаўчук: Гэтыя практычныя заняткі, якія максімальна набліжаныя да рэальнага баявога становішча, будучыя афіцэры праходзяць на палігоне Ваеннай акадэміі Белая Лужа. Гэтыя вучэнні сталі баявым хрышчэннем для першакурснікаў. Асноўная іх мэта - адаптацыя курсантаў да палявых і нават экстрэмальных умоў.
Але перш чым сесці за рычагі бранятэхнікі, курсанты на сабе павінны выпрабаваць усю іх моц. Легчы пад танк, стрэліць з гранатамёта, устанавіць міну - усё гэта першакурснікі ў большасці выпадкаў робяць упершыню. Несумнеўна, падобныя практыкаванні не толькі трэніруюць псіхіку вайскоўцаў, але і адаптуюць іх да рову рухавікоў, стрэлаў і выбухаў.
На думку спецыялістаў армейскай альма-матар, навучанне курсантаў менавіта ў такіх умовах - самы аптымальны спосаб падрыхтоўкі. Бо такім чынам маладыя афіцэры прыходзяць у войскі не толькі з свежымі ведамі, але і з некаторым вопытам.
Першая вайсковая практыка наваспечаных курсантаў чакае ўвосень наступнага года. І яна таксама абавязкова пройдзе падчас чарговых манеўраў арміі. Не выключана, што гэта будуць сумесныя беларуска-расійскія вучэнні.
