У першакласнікаў школы № 25 горада Барысава пакуль няма звычайных урокаў матэматыкі ці беларускай мовы. Верасень - гэта ўводзіны ў школьнае жыццё. Класны кіраўнік з 25-гадовым стажам Ала Лапіцкая ўпэўненая: падмурак ведаў будучых выдатнікаў закладваецца менавіта зараз.
У школе 5 першых класаў. І са старту - паглыбленае вывучэнне пэўных дысцыплін.
Свет навукі ў гэтай школе для сябе адкрываюць 130 першакласнікаў. Акрамя агульнай праграмы, разам з бацькамі яны выбралі напрамкі па інтарэсах. Дзеці дадаткова вывучаюць легаканструяванне і замежныя мовы. Ёсць таксама музычныя, харэаграфічныя і тэатральныя класы.
Лізавета Варанко толькі папоўніла педагагічную сям'ю. Яна - настаўнік рускай і кітайскай моў. Задаволена, што першы запіс у працоўнай менавіта ў родным горадзе. Усяго ж у школы Барысаўскага раёна сёлета прыйшлі больш за 80 маладых спецыялістаў.
Дарэчы, у школе працуе абласны цэнтр беларуска-кітайскага сяброўства, у жніўні адкрылі пляцоўку па супрацоўніцтве з брытанскім саветам. Таксама для ўсебаковага развіцця шматлікія трэнажорныя зоны, ёсць скаладром і басейн. Дарэчы, сёлета ўпершыню арганізавалі спецыялізаваны спартыўны клас.
Увогуле, новы навучальны год у Мінскай вобласці пачаўся амаль для 160 тысяч школьнікаў і каля 30 тысяч настаўнікаў.
