Па выніках мінулага года, беларуская сталіца займае першае месца сярод гарадоў СНД па колькасці браніравання гатэляў і гасцініц. Гэтымі днямі ў Мінску сапраўды шмат турыстаў. Штодзень у беларускую сталіцу прыбывае да тысячы гасцей з розных рэгіёнаў Расіі. Падрабязна Надзея Сербіненка.
Сям'я Казьменка пераадолела адлегласць у 800 кіламетраў, а ўсё для таго, каб зрабіць сэлфі на Кастрычніцкай плошчы ля галоўнай ёлкі Беларусі. Турысты з Курска ў Мінску - на тыдзень, як раз на ўсе навагоднія канікулы.
Наплыў турыстаў з Расіі ў беларускую сталіцу заўсёды прыпадае менавіта на навагоднія святы. Свае працяглыя канікулы многія жыхары Масквы, Санкт-Пецярбурга, Калінінграда, Ніжняга Ноўгарада праводзяць у нас. Згодна са звесткамі расійскіх турагенцтваў, за мінулы год Беларусь наведалі 300 тысяч жыхароў краіны-суседкі.
Мінск стаў самым папулярным горадам сярод расіян па выніках 2016 года. У сярэднім турысты праводзяць у беларускай сталіцы два дні. Што да краіны у цэлым, Беларусь – у першай дзясятцы па папулярнасці. У гэтым жа спісе Італія, Тайланд, Францыя і Грузія.
Да наплыву турыстаў у Мінску падрыхтаваліся загадзя. Распрацавалі спецыяльныя экскурсіі, у тым ліку для дзяцей, а таксама гастранамічныя туры з дэгустацыяй аўтэнтычных беларускіх страў.
Турыстычнай прэм'ерай 2017-га стала выданне "Знайдзі сваю Беларусь". Яно знаёміць замежных турыстаў з нашай краінай упершыню на сямі мовах. Нямецкая, англійская, французская, кітайская і нават арабская – над стварэннем буклета працавала прафесійная каманда лінгвістаў, дызайнераў і фатографаў. Распаўсюджвацца брашуры будуць на міжнародных турыстычных выставах і ў дыпламатычных прадстаўніцтвах Беларусі.
Самы папулярны турыстычны маршрут у Мінску праходзіць праз Верхні горад, Траецкае прадмесце, праспект Незалежнасці, Нацыянальную бібліятэку, “Мінск-Арэну” і Камароўскі рынак.