Гульня, якая спалучае ў сабе элементы спорту, навукі і мастацтва. Мінск - афіцыйны кандыдат на правядзенне Сусветнай шахматнай алімпіяды 2022. Напярэдадні ў сталіцы прайшло пасяджэнне прэзідэнцкага савета Міжнароднай федэрацыі шахмат ФІДЕ. У цырымоніі ў Мінскай гарадской ратушы прынялі ўдзел Міністр спорту і турызму Сяргей Кавальчук, мэр Мінска Андрэй Шорац і віцэ-прэзідэнт ФІДЕ Георгіяс Макропулас. Спаборніцтвы планетарнага маштабу праходзяць раз на два гады і збіраюць каля 3 тысяч удзельнікаў. Акрамя Беларусі на арганізацыю турніру прэтэндуюць Кітай, Аб'яднаныя Арабскія Эміраты і Туніс. Рашэнне будзе прынята на кангрэсе ў Батумі ў канцы верасня.
