Экалагічная катастрофа ў Дзяржынскім раёне - звыш паўтысячы рыбін загінула ў рацэ Уса. Цячэнне атруцілі сцёкі біялагічных адходаў з мясцовага свінакомплексу.
Што ж стала прычынай уцечкі, калі рака адновіцца пасля аварыі? Прычыны і наступствы катастрофы высвятляў Ян Пашкевіч.
Ад свінакомплексу атрутная вада лілася з пагорка ў раку Уса. Сцёкі ператварылі звычайную прэсную ваду ў небяспечную для экасістэмы. За імгненне загінула вялікая колькасць рыбы - звыш паўтысячы асобін.
Месцамі ад адходаў вада нават афарбавалася ў чырвоны колер. Наступствы стыхійнага здарэння заўважылі нават рыбакі з Нёмана – Уса адзін з яго прытокаў.
Хоць асноўны удар рака прыняла намнога вышэй па цячэнні. Нават тут можна знайсці побач з берагам шмат загінуўшай рыбы.
Крыніцай атрутнага ручая сталі ачышчальныя сажалкі свінакомплексу.
Да вялікага патопу прывёў моцны лівень – сховішча адходаў перапоўнілася, вада прарвала земляныя барыкады.
Аднак насамрэч зараз вал на месцы прабоіны сажалкі больш нагадвае часовую латку – астатнія сценкі амаль утрая таўсцейшыя за яго. Такі несвоечасовы рамонт небяспечнага палігона зараз абыдзецца гаспадарцы значна даражэй – пагражае не толькі вялікі штраф.
Акрамя таго, вада з ракі зараз знаходзіцца на праверцы ў лабараторыі. Калі спецыялісты выявяць значныя адхіленні ад нормы – сума штрафу можа значна павялічыцца. Рака з часам ачысціць сама сябе – моцнае цячэнне ўжо растварыла атрутныя сцёкі.
