Бягоніі і астры, петуніі, тагетэсы - больш за мільён летніх кветак высадзяць у Мінску. Сярод сезонных трэндаў таксама злакавыя культуры і шматгадовыя расліны. Традыцыйна азеляніцелі распрацавалі новыя эскізы: кампазіцыі з'явяцца ва ўсіх раёнах сталіцы.
Пра фларыстычныя тэндэнцыі раскажа Алена Вітко.
Экспрэс-майстар-клас ад фларыста са стажам. Амаль 25 гадоў Ларыса Ісупава гарадскую прастору "размалёўвае" квітнеючымі фарбамі. І няхай усё строга па тэхналогіі, рамяство каларытнае. Для жанчыны гэта крыніца натхнення.
Адзін пялёстак за другім - і на раслінным дыване з'яўляецца беларускі арнамент. "Прапіску" кампазіцыя з нацыянальнай гамай атрымала ў Фрунзенскім раёне. Каб захаваць усю выразнасць і яркасць, пасля пасадак пільны догляд: штодзённы паліў і рэгулярная падкормка.
Трэнд на павелічэнне шматгадовых падхапілі ўсе раёны Мінска. Высадзяць амаль 120 тысяч раслін. Цяпер жа спецыялісты займаюцца летнімі кветкамі. У выніку духмянае пано ўпрыгожаць 1 мільён 400 тысяч бутонаў.
Тэматычны кветнік сустракае мінчан і гасцей горада ўздоўж праспекта Дзяржынскага - стракатыя крылы выпрастала сава. На плошчы 70 квадратных метраў распусціліся больш за 6 тысяч раслін. Жоўтыя - гэта тагетэсы, серабрыстыя - цынерарыі, а бардова-фіялетавых колераў дадаюць бягоніі і агератумы.
Летнімі фаварытамі традыцыйна становяцца петуніі. Толькі на плошчы Незалежнасці ў кветкавым дэкоры іх каля 40 тысяч. Кампазіцыя монафармату, аднак у іншых лакацыях пасадкі міксуюць. Новыя кветнікі, напрыклад, з'явяцца ў мікрараёне Дразды, на скрыжаванні праспектаў Пераможцаў і Машэрава, а таксама каля Вялікага тэатра.
Сярод апошніх тэндэнцый - ампельные кветкі. Выставяць амаль 15 тысяч скрынь. Трэцюю частку з іх можна ўбачыць на агароджы ўздоўж праспекта Пераможцаў. Павялічаць сёлета і колькасць вертыкальных канструкцый.
