Сіноптык Дзмітрый Рабаў назваў сакавік "цалкам зімовым" і папярэдзіў аб няўстойлівым характары надвор'я ў Беларусі з 6 па 12 сакавіка, піша БелТА.
Гаворачы пра надвор'е на наступны тыдзень, Рабаў паведаміў, што варта чакаць снегападаў, дажджоў, парывістага ветру.
У панядзелак, 6 сакавіка, па краіне чакаем ад +2 да -2 °C, у аўторак ад +4 да -2 °C.
На 8 Сакавіка, у сераду, чакаюцца больш цёплыя паветраныя масы з поўдня. Пры гэтым у прагнозе таксама ёсць і снег, мокры снег на асноўнай частцы тэрыторыі Беларусі.
"Уначы ў сераду будзе ад +2 па поўдні да -8 °C па паўночным усходзе. Днём ад +1 да +6", - сказаў Рабаў.
З чацвярга на Беларусь будзе насоўвацца актыўны цыклон з Балтыйскага мора: прыйдуць атмасферныя франты з паўночнага захаду, чакаюцца ападкі.
"Уначы ад -1 °C па паўднёвым захадзе да -6 °C па поўначы. Днём у чацвер ад 0 да +3, у пятніцу ад -2 па паўночным захадзе да +6 па паўднёвым захадзе", - расказаў пра надвор'е на другую палову тыдня сіноптык.
Што да прагнозу на выхадныя, то, згодна з папярэднімі данымі, 11 і 12 сакавіка надвор'е не вельмі зменіцца, па краіне чакаецца воблачнасць з праясненнямі, а таксама кароткачасовыя ападкі. У суботу днём прагназуецца ад -1 да +3 °C, у дзённыя гадзіны нядзелі ад -1 да +4 °C.