Да святкавання Дня Незалежнасці далучыліся ў Магілёве. Там у гэтыя хвіліны стартуюць масавыя гулянні. На сувязі наш карэспандэнт Андрэй Ястрабаў.
Магілёў віншуе ўсю Беларусь з Днём Незалежнасці. І Буйніцкае поле для старту марафону мерапрыемстваў выбрана не выпадкова. Гэта сапраўдны сімвал гераічнасці. Менавіта тут у 1941 годзе чырвонаармейцы пры падтрымцы гараджан стрымлівалі нямецкую армію 23 дні.
Да мемарыяла ўшанаваць памяць герояў, павіншаваць ветэранаў прыйшлі сотні гараджан і жыхароў раёна. Грамадскія арганізацыі, прадстаўнікі прадпрыемстваў, вайскоўцы, моладзь - усе яны падтрымалі акцыю "Беларусь памятае". Хвіліна маўчання, і шматлікія букеты кветак леглі да падножжа капліцы.
Асаблівыя словы падзякі прагучалі ў адрас ветэранаў. Яны і сёння не стрымлівалі слёз, успамінаючы ваенныя гады. І радасць за мірнае неба вось ужо 75 гадоў.
Ускладанне ў Буйнічах дало старт шматлікім мерапрыемствам свята. Ва ўсіх райцэнтрах рэгіёна пройдуць мітынгі, канцэрты. У Магілёве гараджан і гасцей свята пачастуюць салдацкай кашай, выступяць лепшыя самадзейныя калектывы. Вялікая праграма для дзяцей у парку "Падніколле".
Вечарам на плошчы Славы ў Магілёве гараджан і гасцей чакае вялікая канцэртная праграма. Адкрые яе ўрачысты марш часцей Магілёўскага ваеннага гарнізона.
Да святкавання Дня Незалежнасці далучыліся ў Магілёве
3 июля 2019