Да 2035 года ў лічбавай эканоміцы Беларусі аддалена змогуць працаваць больш як два мільёны чалавек

Да 2035 года ў лічбавай эканоміцы Беларусі аддалена змогуць працаваць больш як два мільёны чалавек - пра гэта заявіў Ігар Маманенка, член прэзідыума Рэспубліканскай канфедэрацыі прадпрымальніцтва. Паводле нацыянальнай праграмы "Беларусь – IT-краіна" інфармацыйныя тэхналогіі здольныя стаць асноўнай крыніцай прыбытку для шматлікіх грамадзян і бізнесу. Вялікі разлік робіцца і на тое, што мода на працу з дома дапаможа людзям з абмежаванымі магчымасцямі палепшыць сваё фінансавае становішча і быць запатрабаванымі на рынку працы.

Ігар Маманенка, член прэзідыума вышэйшага каардынацыйнага савета Рэспубліканскай канфедэрацыі прадпрымальніцтва: "Гэта не абавязкова праграмісты. Самая вялікая колькасць праграмістаў у Фінляндыі - 7,2 працэнта. Гэта любая праца па каналах інтэрнэту. А ў свеце такіх рабочых месцаў - сотні мільёнаў ужо, і іх колькасць нарастае. Са з'яўленнем інтэрнэту планета Зямля становіцца проста тваёй рабочай пляцоўкай".

Паводле звестак Сусветнай арганізацыі працы, колькасць занятых дыстанцыйна ў свеце расце. Толькі ў Японіі і ЗША іх доля ўжо дасягнула амаль 40 %. У Беларусі гэты сегмент фрылансу толькі фарміруецца. Але, паводле слоў экспертаў, высокі ўзровень адукаванасці нашых людзей кожны год будзе павялічваць колькасць аддалена занятых.