Змены ў Канстытуцыю Беларусі выклікалі сур'ёзную цікавасць у беларускім грамадстве

У Беларусі працягваецца ўсенароднае абмеркаванне паправак у Канстытуцыю. Змены ў Асноўны закон краіны выклікалі сур'ёзную цікавасць у беларускім грамадстве.

Аб гэтым гавораць у працоўных калектывах, грамадскім транспарце і нават за святочным сталом. Яно і зразумела. Беларусь закладвае арыенціры на дзесяцігоддзі наперад. Захаванне сацыяльных гарантый, механізмы па стабілізацыі палітычнай сістэмы і многае іншае. Папраўкі складана назваць касметычнымі - яны сапраўды закранаюць усе сферы грамадскага і палітычнага жыцця краіны. Адна з іх звязана з павелічэннем тэрміна паўнамоцтваў для дэпутатаў і фарміраваннем адзінага дня галасавання.

Да сярэдзіны студзеня кожны ахвочы мае магчымасць унесці свае прапановы, якія ў выніку могуць увайсці ў якасці паправак  у новую рэдакцыю Канстытуцыі.

Прапановы можна агучыць па тэлефоне. Працуе адзіная рэспубліканская гарачая лінія. Датэлефанавацца можна па буднях з 10:00 да 13:00 і з 14:00 - да 17:00.

Меркаванні грамадзян па праекце змен і дапаўненняў Канстытуцыі, а таксама магчымыя прапановы накіроўваюцца ў НЦПІ па электроннай пошце sbor@ncpi.gov.by. Спецыяльную форму можна запоўніць на права.бай. Прымаюцца водгукі і ў пісьмовым выглядзе па пошце на адрас Нацыянальнага цэнтра прававой інфармацыі з пазнакай "Канстытуцыя". З праектам змен Асноўнага закону можна таксама азнаёміцца на інтэрнэт-партале Прэзідэнта Беларусі.