Паводле дакумента, на найбліжэйшыя 8 гадоў абласны цэнтр стане, без перабольшання, адной вялікай будпляцоўкай. Прадугледжана будаўніцтва новых школ, паліклінік, шматфункцыянальных бізнес-цэнтраў, сучасных жылых масіваў. А яшчэ - рамонт мастоў, вызваленне ад трухлявага жылля. Пры гэтым улічваліся пажаданні і заўвагі, дадзеныя падчас рабочай паездкі Кіраўніка дзяржавы ў Віцебскі і Магілёўскі рэгіёны ў лістападзе мінулага года.
Як зменіцца Магілёў да 2025 года - ведае Андрэй Ястрабаў. Знайсці ў вялікім горадзе ўдзельніка самай першай маштабнай забудовы Магілёва апынулася справай не простай. Але нам удалося. Анатоль Чапчугоў. Гэта, у тым ліку, і яго рукамі ў далёкія 70-ыя будаваўся самы вялікі шматпавярховы жылы дом абласнога цэнтра. З-за сваёй працягласці ў народзе яго назвалі кітайскай сцяной. З яго ўзвядзеннем у адбудаваны пасля вайны горад быццам удыхнулі новае жыццё.
Аб неабходнасці добраўпарадкавання горада, амаладжэнні яго аблічча, наданні глянцу не раз гаварыў і Аляксандр Лукашэнка, наведваючы Магілёў. У лістападзе 2016-га ў ратушы Прэзідэнту ўпершыню паказалі праект генеральнага плана будучых ператварэнняў. Амаль паўсотні прапаноў - гэта і будаўніцтва манументальнай аркі на ўездзе ў горад, і вынас з цэнтра прыватнага сектара, і забудова нетыпавымі шматпавярхоўкамі. Новыя паркавыя зоны і сучасныя гандлёвыя цэнтры. Тут жа Прэзідэнт дае даручэнні галоўнаму архітэктару і мэру: з рэканструкцыяй Магілёва больш цягнуць нельга.
Абнаўлення Магілёва чакаюць і яго жыхары. Людзі з самага пачатку грамадскага абмеркавання генплана не жадалі заставацца кансерватарамі.
Дальш - больш: засведчылі ў гарадской мэрыі. Старт новай праграме развіцця Магілёва дадзены ў Казіміраўцы. Мікрараён, які першым сустракае гасцей са сталіцы. Зусім хутка ён прырасце новымі квадратнымі метрамі жылля - амаль паўтара мільёна. Тут ужо будуецца новы дзіцячы сад на 240 месцаў. Дарэчы, здадуць яго ўжо сёлета. Будзе і школа, і паліклініка, і эксперыментальныя для Беларусі дзіцячыя пляцоўкі.
А яшчэ - 18-метровая арка ў гонар 750-годдзя Магілёва. Яе ўзвядуць у самым цэнтры транспартнага кальца на ўездзе ў горад. З падземным пераходам. У будучыні - не толькі ўпрыгажэнне абласнога цэнтра, але і турыстычная мека, упэўненыя архітэктары. Яшчэ тут узвядуць сацыяльныя аб'екты і бізнес-цэнтр.
Маштабная рэканструкцыя, паводле новага генплана, закране практычна ўсе галоўныя дарожныя артэрыі Магілёва - у тым ліку і масты. Дарэчы, упершыню будзе мадэрнізаваны самы працяглы - 402 метры - так званы новы мост. З'явіцца ў горадзе і свой пешаходны мост з аркамі - яго пабудуюць побач з універсітэтам Куляшова. Абновяцца і гарадскія паркі.
Пабудуюць і самую незвычайную ў Магілёве лесвіцу. Спуск ад плошчы Арджанікідзэ да парку на беразе Дняпра. Злева - манастыр, справа - ажыўленая траса: мост са львамі і самым "культурным" падземным пераходам у горадзе. У мэрыі ўпэўненыя: турысты ацэняць дызайн.
Наогул, Магілёў у найбліжэйшыя 8 гадоў стане адной вялікай будаўнічай пляцоўкай. Але і вынік таго варты.
Мэр Магілёва ўжо гадзінамі можа вадзіць экскурсіі па горадзе, распавядаючы аб праектах новага генплана. Гаворыць - усіх ператварэнняў, якія заўважаць жыхары абласнога цэнтра ў найбліжэйшы час, не злічыць. Першай абновяць плошчу Славы да Дня Незалежнасці. У цэлым жа, толькі сёлета на рэалізацыю гарадскіх праектаў з дзяржбюджэту будзе накіравана звыш 11 з паловай мільёнаў рублёў.
Дарэчы, каб прыняць удзел у абнаўленні Магілёва, гараджанам доўга чакаць не прыйдзецца. 22 красавіка пройдзе рэспубліканскі суботнік. У абласным цэнтры высадзяць 750 маладых дрэў, па колькасці юбілейных гадоў Магілёва.
