Тры гадзіны на лёдзе для самага вялікага ўлову. На вяслярным канале пад Мінскам прайшоў чэмпіянат па зімовай рыбалцы сярод прафесіяналаў і юніёраў. Паказаць свае навыкі ў здабычы трафеяў прыехалі больш за 70 аматараў "клёвай справы", а таксама госці з Расіі.
Як правільна падабраць прынаду, якую тэхніку лоўлі лепш выбраць, каб атрымаць важкі ўлоў, разбіраўся Ілья Цвяткоў.
Прасвідраваць лунку, закінуць прыкорм і атрымаць самы багаты ўлоў. На канале пад Мінскам спаборнічаюць аматары і прафесіяналы ў рыбнай лоўлі.
Лакацыяй для лядовага турніру па традыцыі стаў адзін з заліваў вяслярнага канала, што пад Заслаўем. У зімовы перыяд гэта адзін з самых рыбных вадаёмаў вобласці. Тут і неабходная бяспечная таўшчыня пакрыцця - больш за 20 сантыметраў.
Удзел прынялі больш за 70 рыбакоў з усёй краіны. У праграме лоўля рыбы ў дзвюх дысцыплінах: на мармышку з лёду і на зімовую блешню. Доўжыцца ціхае паляванне на падводных насельнікаў тры гадзіны.
У спецыяльнай рыбацкай уніформе і юніёры. Арцём Бруй з вудай не расстаецца з дзяцінства. Кажа, што рыбнаму промыслу яго навучылі сябры. На спаборніцтвах па рыбнай лоўлі нароўні з прафесіяналамі са шматгадовым вопытам Арцём выступае не першы год.
Удзельнікі могуць вылавіць амаль 20 кілаграмаў рыбы. Вынік залежыць ад абранай тактыкі. Паказаць сваё майстэрства на вяслярны канал сёлета прыехалі рыбаловы з Расіі.
Дарэчы, менавіта ўдзельніку расійскай каманды ўдалося атрымаць самы вялікі трафей на мармышку. Лепшым у дысцыпліне "Лоўля на блешню" стаў рыбак з Баранавіч, а сярод юніёраў перамаглі мінчане.
