Фестываль "VIVA, РОВАР" праходзіць ужо трэці раз. Аматары двухколавага транспарту да свята падышлі крэатыўна. Шматлікія ў касцюмах.
Зараз каля стэлы працуе Крысціна Камыш (прамое ўключэнне).
Дзень добры. Літаральна пару хвілін таму першыя веласіпедысты адправіліся на дыстанцыю. А гэта значыць, што веласезон афіцыйна адкрыты. Калона рухаецца па маршруце ад стэлы да "Мінск-Арэны" і зваротна. Усяго 10 кіламетраў і 400 метраў. На гэтым участку, хачу нагадаць, закрыты рух для ўсіх іншых відаў транспартных сродкаў. Ён адновіцца ў 16:00. Сам жа велакарнавал дзівіць сваімі рэкордамі, фарбамі і крэатыўнасцю.
Збор пачаўся ў 13:30. Тыя ўдзельнікі, якія прайшлі рэгістрацыю, атрымлівалі свае нумары. Яна была абсалютна бясплатная. Хто не паспеў зарэгістравацца, проста далучаўся да велакалоны. Тут і маленькія дзеці, і людзі старэйшага пакалення. Сюды прыехалі кампаніямі, сем'ямі, парамі. "VIVA, РОВАР" становіцца міжнародным карнавалам. У Мінск прыбылі аматары двухколавага транспарту са Швецыі, Германіі, Швейцарыі і Эстоніі.
Дзівіць крэатыўнасць веласіпедыстаў. Сур'ёзныя людзі сёння не жадаюць быць сур'ёзнымі. Тут можна сустрэць касманаўтаў, прынцэс, індзейцаў і піратаў. У каго на што хопіць фантазіі.
Фэст праходзіць трэці раз. Леташні вопыт гаворыць, што фінішаваць веласіпедысты пачнуць праз 30 хвілін. Але на гэтым карнавал не скончыцца.
У парку Перамогі арганізавана больш як 30 забаўляльных пляцовак, у тым ліку для дзяцей. Плануецца выступленне зорак беларускай эстрады.
І самае прыемнае для тых, хто зарэгістраваўся. Гэтыя людзі будуць удзельнічаць у розыгрышах прызоў і сувеніраў. Галоўныя з якіх - тры веласіпеды.
